محمدیہ انٹرنیشنل انگلش اسکول، ہنگولی میں شاندار سائنس ایگزیبیشن کا کامیاب انعقاد

ہنگولی :20؍دسمبر(صباء فردوس) محمدیہ انٹرنیشنل انگلش اسکول، ہنگولی کے زیرِ اہتمام منعقدہ سائنس ایگزیبیشن نہایت کامیابی، وقار اور علمی شان کے ساتھ اختتام پذیر ہوئی۔ یہ سائنسی نمائش طلبہ کی تخلیقی صلاحیتوں، فکری پختگی اور تحقیقی ذوق کا حسین امتزاج ثابت ہوئی جس نے حاضرین کو بے حد متاثر کیا۔اس نمائش میں (80) سے زائد سائنسی پروجیکٹس اور ماڈلز پیش کیے گئے، جن میں طلبہ نے جدید سائنسی تصورات، روزمرہ مسائل کے عملی حل اور اختراعی سوچ کو نہایت سلیقے اور اعتماد کے ساتھ پیش کیا۔ طلبہ کے یہ ماڈلز والدین، اساتذہ اور معزز مہمانوں کی خصوصی توجہ کا مرکز بنے اور ہر گوشے سے داد و تحسین کی آوازیں سنائی دیں۔ اس باوقار تقریب کی زینت بننے والے معزز مہمانان میں پروفیسر ڈاکٹر محمد اقبال جاوید صاحب — صدرِ شعبۂ اردو، شواجی کالج و امیرِ مقامی جماعت اسلامی ہند، ہنگولی، ڈاکٹر سندھیا ہٹکر (MBBS, DGO)، ڈاکٹر راہل واگھمارے (MBBS, DMRE)، ڈاکٹر زہرہ… ڈاکٹر مدثر ایم خان (BHMS, CGO)، حنا مرزا میڈم (M.Sc Chemistry, B.Ed)، فہد نبیل سر (M.Sc Botany) اور سیدہ عالیہ سمرین —M.Sc فوڈ اینڈ نیوٹریشن مہاراشٹر CET PG ٹاپر، گولڈ میڈلسٹ، یاشفن دبئی میں لٹریچر اسکینر شامل تھے۔ تقریب میں اسکول کے معزز صدر حاجی شیخ نہال بھائی کی موجودگی نے اس پروگرام کی وقعت میں مزید اضافہ کیا۔ تمام مہمانان نے طلبہ کی سائنسی پیشکشوں کو نہایت سراہا اور اسکول انتظامیہ و اساتذہ کی محنت، رہنمائی اور تعلیمی وژن کی بھرپور تعریف کی۔یہ بات باعثِ مسرت ہے کہ اس سائنسی نمائش کو والدین اور مہمانانِ گرامی کی جانب سے نہایت مثبت اور حوصلہ افزا ردِعمل حاصل ہوا۔ مزید برآں، مختلف ذرائع ابلاغ کے نمائندے اور نیوز رپورٹرز بھی موقع پر موجود رہے جنہوں نے اس تعلیمی سرگرمی کو خصوصی کوریج دی۔ بلاشبہ یہ سائنس ایگزیبیشن صرف ایک تعلیمی سرگرمی نہیں بلکہ طلبہ کے اندر پوشیدہ صلاحیتوں کو نکھارنے، سائنسی شعور بیدار کرنے اور مستقبل کے معمار تیار کرنے کی ایک کامیاب کوشش ثابت ہوئی۔ محمدیہ انٹرنیشنل انگلش اسکول، ہنگولی اس کامیاب انعقاد پر مبارکباد کا مستحق ہے۔