او بی سی کے دباؤ میں، مراٹھا مظاہرین کے خلاف فرضی کیس درج کیے گئے: جارنگے پاٹل

ممبئی: 14 نومبر:او بی سی کے خلاف اپنے جارحانہ موقف کو جاری رکھتے ہوئے، مراٹھا ریزرویشن کارکن منوج جارنگے پاٹل نے الزام لگایا ہے کہ او بی سی رہنماؤں نے مراٹھا کوٹہ ایجی ٹیشن کے دوران مراٹھا نوجوانوں کے خلاف فرضی کیس درج کرنے کے لیے ریاستی حکومت پر دباؤ ڈالا۔ انہوں نے الزام لگایا کہ حکومت او بی سی قائدین کے کہنے پر کام کررہی ہے۔ جارنگ پاٹل کا یہ بیان او بی سی رہنماؤں کے الزامات کے پس منظر میں آیا ہے، جنہوں نے کارکن پر ریاست میں امن و امان کی صورتحال کو خراب کرنے کا الزام لگایا ہے۔ جارنگے پاٹل نے مطالبہ کیا ہے کہ تمام مراٹھوں کو کنبی سرٹیفکیٹ دیا جائے تاکہ وہ او بی سی زمرہ کے تحت کوٹہ کے فوائد حاصل کرسکیں۔ تاہم، او بی سی رہنماؤں نے ان کے مطالبے کی مخالفت کرتے ہوئے کہا کہ اس سے دیگر او بی سی برادریوں کو نقصان پہنچے گا۔ جارنگے پاٹل نے کہا، ”ہم (مراٹھا برادری) ریاست میں امن و امان کی صورتحال کو نقصان پہنچانے کے ذمہ دار نہیں ہیں۔ دراصل ہم امن کی اپیل کر رہے ہیں۔ یہ (مراٹھا ریزرویشن) تحریک مہاراشٹر کی سب سے پرامن تحریک ہے۔ عام او بی سی شخص اس سے پریشان نہیں ہے۔ لیکن، ان کے او بی سی رہنما تحریک کے دوران تشدد میں ملوث ہیں۔ کارکن نے او بی سی لیڈروں پر مراٹھا ریزرویشن کی مخالفت کرنے کے اپنے الزامات کو دہرایا۔ انہوں نے کہا کہ "(او بی سی) وزراء ، اپوزیشن لیڈر، جو آئینی عہدوں پر فائز ہیں، مراٹھا ریزرویشن کے خلاف آواز اٹھا رہے ہیں۔” یہ او بی سی لیڈر تھے جنہوں نے ریاستی حکومت پر مراٹھا کارکنوں کے خلاف فرضی کیس درج کرنے کے لیے دباؤ ڈالا تھا۔ ناندیڑ، ہنگولی، سولاپور جیسے اضلاع میں او بی سی لیڈروں کے بہت سے پیروکار مراٹھا کارکنوں کے خلاف فرضی کیس درج کر رہے ہیں اور ریاستی حکومت بھی ان کی ہدایات پر کام کر رہی ہے۔ لیکن جب تک ہمیں ریزرویشن نہیں مل جاتا ہم آرام سے نہیں بیٹھیں گے، ایسا جارنگے پاٹل نے کہا۔