150 روزہ ای۔گورننس اصلاحاتی پروگرام میں ناندیڑ پولیس رینج کو اوّل مقام

ناندیڑ:28؍مارچ (نمائندہ اعتبار) مہاراشٹر ریاست کے وزیر اعلیٰ کی ہدایت کے مطابق ریاست بھر میں نافذ کیے گئے 150 روزہ ای۔گورننس اصلاحاتی پروگرام کے جائزے میں ناندیڑ پولیس رینج دفتر نے ریاست کے تمام رینجز میں پہلا مقام حاصل کرتے ہوئے نمایاں کامیابی حاصل کی ہے۔28 مارچ کو ممبئی کے سہیا دری اتھتی گرہ میں منعقدہ انعامی تقریب میں وزیر اعلیٰ دیویندر فڑنویس نے پولیس ڈپٹی انسپکٹر جنرل شہاجی اوماپ کو توصیفی سند پیش کر کے ان کی ستائش کی۔ اس سے قبل مسٹر اُماپ نے ناندیڑ رینج میں نافذ کیے گئے مختلف جدید اقدامات کی تفصیلات بھی پیش کیں۔7 مئی 2025ء کو وزیر اعلیٰ مہاراشٹر نے تمام سرکاری دفاتر میں انتظامی بہتری لانے کے لیے 150 روزہ ای۔گورننس اصلاحاتی پروگرام نافذ کرنے کی ہدایت دی تھی۔ اس پروگرام کا مقصد انتظامیہ کو عوام دوست، تیز رفتار، شفاف اور ٹیکنالوجی پر مبنی بنانا تھا، جس کے لیے مختلف سطحوں پر وسیع اصلاحات کی توقع کی گئی تھی۔ اس میں ویب سائٹ کی بہتری، آپلے سرکار پورٹل، ای۔آفس نظام، ڈیٹا ڈیش بورڈ، سوشل میڈیا انضمام، واٹس ایپ کے ذریعے خدمات کی فراہمی اور جدید ویب ایپلیکیشنز پر خصوصی توجہ دی گئی۔اسی کے تحت پولیس ڈپٹی انسپکٹر جنرل شہاجی اُماپ نے ناندیڑ رینج کے لیے نئی ویب سائٹ تیار کروائی جو زیادہ محفوظ اور عوام دوست ہے۔ ویب سائٹ پر مختلف سرکاری اسکیموں اور خدمات کا انضمام، آپلے سرکار پورٹل کے تحت شکایات کا مقررہ وقت میں ازالہ، ای۔آفس نظام کے ذریعے کاغذ کے بغیر تیز فائل نمٹارہ، انٹرایکٹو ڈیش بورڈ کے ذریعے درست اور تازہ معلومات کی فراہمی جیسے اقدامات کیے گئے۔ اس کے علاوہ درخواستوں کی جانچ کے لیے ’’سنویدنا‘‘ نامی اے آئی پر مبنی نظام، شکایت کنندگان کے اطمینان کے لیے فیڈبیک سہولت، جرائم کی تفتیش پر نظر رکھنے کے لیے ’’ایگل آئی‘‘ نظام اور غیر قانونی سرگرمیوں کے خاتمے کے لیے ’’خبر‘‘ ہیلپ لائن (91 50 100 100) بھی شروع کی گئی، جو اہم ثابت ہوئیں۔150 دن کے اس پروگرام کی مدت 10 جنوری 2026ء کو مکمل ہونے کے بعد، مختلف رینج دفاتر کی کارکردگی کا ابتدائی جائزہ پولیس ڈائریکٹر جنرل دفتر نے لیا، جس میں چار رینج دفاتر کو منتخب کیا گیا، جن میں ناندیڑ رینج بھی شامل تھی۔ بعد ازاں ان دفاتر کی حتمی جانچ ہندوستانی کوالٹی کونسل نے کی، جس نے پولیس ڈپٹی انسپکٹر جنرل دفتر کی کارکردگی کو سراہتے ہوئے ناندیڑ رینج کو پہلا مقام دیا۔اس سے قبل وزیر اعلیٰ کی رہنمائی میں نافذ کیے گئے 100 روزہ ایکشن پلان میں بھی ناندیڑ رینج دفتر نے ریاست میں دوسرا مقام حاصل کیا تھا۔پولیس ڈپٹی انسپکٹر جنرل شہاجی اُماپ نے بتایا کہ اس کامیابی میں رینج دفتر کے تمام پولیس افسران، عملہ اور وزارت کے ملازمین کے ساتھ ساتھ Rythmbytes کمپنی کے سافٹ ویئر انجینئر ہرش آنند شرما، SETTribe کمپنی کے ڈائریکٹر سارانگ واکوڈیکر، سافٹ ویئر انجینئر شہباز خان اور پولیس اہلکار دیپک پوار کی شب و روز محنت کا اہم کردار رہا ہے۔ انہوں نے کہا کہ اس کامیابی میں ناندیڑ رینج کے ہر افسر اور اہلکار کا قیمتی تعاون شامل ہے۔