یومِ جمہوریہ کے موقع پر فیض کیمپس میں تقاریر کے مقابلے

پربھنی:24؍جنوری (ضلع نامہ نگار اعتبار نیوز محمد سرور شریف)ملک کے 76ویں یومِ جمہوریہ کے پُروقار موقع پر فیض کیمپس میں تقاریر کے شاندار مقابلوں کا انعقاد کیا گیا، جس میں فیض العلوم پرائمری اسکول اور فاطمہ ہائی اسکول و جونیئر کالج کے طلبہ و طالبات نے جوش و خروش کے ساتھ شرکت کی۔ اس پروگرام کی صدارت ادارۂ فیض العلوم ایجوکیشن سوسائٹی کے بانی و سیکریٹری ڈاکٹر محمد سمیع اللہ خان نے فرمائی۔اس موقع پر اسٹیج پر تالیا میڈم اور فاطمہ ہائی اسکول و جونیئر کالج کے پرنسپل ثناء اللہ خان صاحب بھی جلوہ افروز تھے۔ پروگرام کی نظامت کے فرائض نہایت خوش اسلوبی کے ساتھ فرحان سر نے انجام دیے، جس سے تقریب میں مزید نکھار پیدا ہوا۔تقاریر کے مقابلے میں طلبہ نے آئینِ ہند، جمہوریت کی اہمیت، قومی یکجہتی اور حب الوطنی جیسے موضوعات پر پُراثر تقاریر پیش کیں۔ کم عمر طلبہ کا اعتماد اور اندازِ بیان قابلِ ستائش رہا، جسے حاضرین نے خوب سراہا۔ اساتذہ اکرام کی رہنمائی اور حوصلہ افزائی سے پروگرام نہایت منظم اور کامیاب ثابت ہوا۔صدرِ اجلاس ڈاکٹر محمد سمیع اللہ خان نے اپنے خطاب میں طلبہ کی صلاحیتوں کی تعریف کرتے ہوئے کہا کہ اس طرح کی سرگرمیاں بچوں میں خود اعتمادی اور قومی شعور بیدار کرتی ہیں۔اس پروگرام سے متعلق تفصیلات معلم محمد ابرار علی خان نے فراہم کی۔