گریجویٹس اور اساتذہ کے حلقوں سے مہاراشٹر قانون ساز کونسل کے دو سالہ انتخابات وقتیہ ملتوی!

پربھنی:14؍مئی( نامہ نگار محمد سرور شریف) الیکشن کمیشن آف انڈیا نے پریس نوٹ نمبر ECI/PN/76/2024 مورخہ 08 مئی 2024 کے ذریعے مہاراشٹر قانون ساز کونسل کے 02 گریجویٹس اور 02 اساتذہ کے حلقوں سے دو سالہ انتخابات کے شیڈول کا اعلان کیا تھا۔ مذکورہ انتخابات کے لیے پولنگ کی تاریخ 10 جون 2024 مقرر کی گئی تھی۔ مگر مہاراشٹر میں 2 مئی 2024 سے لے کر 15 جون 2024 تک اسکولوں کو گرمائی تعطیلات کا حکومت نےاعلان کیا ہے۔ جس کی تفصیلات اکھل بھارتیہ اردو شکشک سنگھ 11138 کی جانب سے تنظیم کے بانی ساجد نثار احمد و دیگر تنظیمیوں نے الیکشن کمیشن آف انڈیا و ریاستی الیکشن کمیشن کو پیش کر کے مزکورہ الیکشن گرما ئی تعطیلات کے بعد منعقد کرنے کا مطالبہ کیا تھا۔ الیکشن کمیشن نے اس سلسلے میں مذکورہ تنظیموں کی نمائندگی پر غور کرتے ہوئے مہاراشٹر قانون ساز کونسل کے مذکورہ دو سالہ انتخابات کے پروگرام کو آئندہ نئی تاریخ کے اعلان تک ملتوی کرنے کا فیصلہ کیا ہے۔اس ضمن میں سکریٹری سمن کمار داس نے 14 مئی 2024 کو لیٹر جاری کیا۔