کیمسٹری کے پرچے میں ضلع کے لاپرواہ نگرانی دستہ کو معطل کیا گیا

ناندیڑ:18؍فروری ( نمائندہ اعتبار) آج 18؍فروری کو جماعت 12ویں کے صبح کے سیشن میں کیمسٹری مضمون کا پرچہ تھا۔ اس دن بھی ضلع کے 109 امتحانی مراکز پر نگرانی دستہ کے ذریعہ زوم ویب کاسٹ کے ذریعے پورے وقت امتحان کی نگرانی کی گئی۔آج کے پرچے میں تعلقہ عمری کے نوتن ہائیر سیکنڈری اسکول کے امتحانی مرکز پر مقرر نگرانی دستہ کے سربراہ اور اراکین غیر حاضر رہنے کی وجہ سے انہیں معطل کرنے کے احکامات ضلع کلکٹر راہول کرڈیلے نے متعلقہ محکموں کو جاری کئے۔ اس میں نگرانی دستہ کے سربراہ توسیعی آفیسر محکمہ زراعت نرہری منجال، دستہ کے رکن و مرکز انچارج موہن بھوسلے اور گرام ریونیو آفیسر پانڈورنگ گبرے شامل ہیں جو امتحانی مرکز پر غیر حاضر تھے۔ انہوں نے کوئی پیشگی اطلاع بھی نہیں دی، جس کے باعث امتحانی کام میں لاپرواہی اور فرائض میں کوتاہی کا الزام عائد کرتے ہوئے انہیں خدمات سے معطل کرنے کے لئے متعلقہ محکموں کو ہدایات دی گئی ہیں۔آج صبح کے کیمسٹری پرچے میں کل 24406 امیدواروں میں سے 24073 امیدوار حاضر رہے، اس طرح حاضری کا تناسب 98.64 فیصد رہا۔ جبکہ دوپہر کے ریاستیات کے پرچے میں کل 13207 امیدواروں میں سے 12594 امیدوار حاضر رہے اور حاضری کا تناسب 95.36 فیصد رہا۔ہر امتحانی مرکز پر نگرانی دستہ کے ذریعہ زوم ویب کاسٹ کے ساتھ ساتھ ڈرون اور ویڈیو کیمروں کے ذریعے پورے وقت نگرانی کی گئی۔ اسی دوران محترمہ سنگیتا دیوی ہائیر سیکنڈری آشرم اسکول، دہیلی ٹانڈا تعلقہ کنوٹ کے امتحانی مرکز پر ایک طالب علم نقل کرتے ہوئے پایا گیا، جس پر اسسٹنٹ ضلع کلکٹر و سب ڈویژنل آفیسر زینت چندر دونتولا نے بورڈ کے ضابطہ کے مطابق کارروائی کرتے ہوئے رپورٹ بورڈ کو روانہ کی۔ اسی مرکز پر بورڈ کی ہدایات اور نقل سے پاک مہم کے تحت بقیہ سوالیہ پرچے سی سی ٹی وی نگرانی میں نہیں رکھے گئے، امیدواروں کی مناسب جانچ نہیں کی گئی اور اضافی پولیس بندوبست بھی طلب نہیں کیا گیا، اس لئے مرکز ڈائریکٹر گُٹے کو ذمہ دار قرار دیتے ہوئے انہیں معطل کرنے کے لئے متعلقہ اسکول انتظامیہ کو ہدایت دی گئی ہے۔محترمہ سنگیتا دیوی ہائیر سیکنڈری آشرم اسکول، دہیلی ٹانڈا تعلقہ کنوٹ کے اصل ہیڈماسٹر پانڈورنگ آڑے نے امتحانی مرکز پر ضروری بنیادی سہولتیں فراہم نہیں کیں جس کے باعث امتحان کو نقل سے پاک ماحول میں منعقد کرنے میں رکاوٹ پیدا ہوئی، لہٰذا انہیں خدمات سے معطل کرنے کے لئے ڈائریکٹر، دیگر پسماندہ و بہوجن بہبود محکمہ، ناندیڑ کو مطلع کیا گیا ہے۔اسی طرح سنت نام دیو مہاراج جونیئر کالج، پیتھوڑج تعلقہ قندھار کے امتحانی مرکز پر دو طلبہ نقل کرتے ہوئے پائے گئے، جن کے خلاف ڈپٹی کلکٹر اجئے شندے نے بورڈ کے ضابطہ کے مطابق کارروائی کرتے ہوئے رپورٹ بورڈ کو بھیج دی ہے۔ نیز دہیلی ٹانڈا اور پیتھوڑج کے مرکز ڈائریکٹروں کو فوری طور پر تبدیل کر کے ان کی جگہ دیگر مرکز ڈائریکٹروں کی تقرری کی گئی ہے، ایسی اطلاع سیکنڈری ایجوکیشن آفیسر نے پریس نوٹ کے ذریعے دی ہے۔