ڈاکٹر احسن زبیری کی شاندار طبی خدمات کا اعتراف، ریڈیئنٹ انسٹی ٹیوٹ میں تہنیتی تقریب کا انعقاد

ناندیڑ:2 فروری(راست) معروف جنرل سرجن ڈاکٹر احسن زبیری کو یومِ جمہوریہ کے موقع پر ضلعی کلیکٹر آفس میں’’اتکرُشت میڈیکل آفیسر‘‘ کے باوقار اعزاز سے نوازا گیا۔ یہ اعزاز وزیر سرپرست مسٹر ساوے کے ہاتھوں سے پیش کیا گیا، جو ڈاکٹر زبیری کی بے مثال طبی خدمات کا اعتراف تھا۔ اس خوشی کے موقع پر ریڈیئنٹ انسٹی ٹیوٹ آف فاؤنڈیشن اسٹڈیز، ناندیڑ میں ایک شاندار تہنیتی تقریب کا انعقاد کیا گیا۔تقریب کے دوران ڈاکٹر زبیری کی طبی اور فلاحی خدمات کو اجاگر کیا گیا اور انہیں ریڈیئنٹ انسٹی ٹیوٹ کے طلبہ سے متعارف کرایا گیا۔ وہ مریم اسپتال کے بانی اور ارحم چیریٹیبل اسپتال کے سی ای او کے طور پر اعلیٰ معیار کی طبی سہولیات فراہم کر رہے ہیں۔ ضلع کنوٹ میں میڈیکل آفیسر کی حیثیت سے ان کی غیرمعمولی سرجیکل مہارت اور مریضوں کے ساتھ ہمدردانہ رویہ نے انہیں طبی برادری میں ایک منفرد مقام عطا کیا ہے۔طبی خدمات کے ساتھ ساتھ، ڈاکٹر زبیری سماجی اور دینی سرگرمیوں میں بھی پیش پیش ہیں۔ وہ جماعت اسلامی کے رکن ہونے کے ساتھ ساتھ ایک مقامی مسجد کے صدر بھی ہیں، جہاں وہ جمعہ کے خطبات دیتے اور مرہٹی و اردو میں قرآنی دروس کا اہتمام کرتے ہیں۔ ان کی ان کاوشوں نے سماج میں روحانی اور فلاحی بیداری کو فروغ دیا ہے۔اس موقع پر، ڈاکٹر زبیری نے ریڈیئنٹ انسٹی ٹیوٹ کے طلبہ سے براہِ راست ملاقات کی اور اپنی جدوجہد اور کامیابی کے تجربات شیئر کیے۔ ان کی متاثر کن گفتگو نے نوجوانوں میں خدمتِ خلق اور کامیابی کا جذبہ بیدار کیا اور انہیں آگے بڑھنے کی تحریک دی۔یہ تقریب ڈاکٹر زبیری کی انتھک طبی اور سماجی خدمات کے اعتراف میں ایک سنگ میل ثابت ہوئی۔ ریڈیئنٹ انسٹی ٹیوٹ کے مینیجنگ ڈائریکٹر ایس ایم صمیم اور الطاف حسین سر نے ڈاکٹر زبیری کو نیک تمناؤں اور دعاؤں سے نوازا اور ان کی خدمات کو خراجِ تحسین پیش کیا۔یومِ جمہوریہ پر ملنے والا یہ اعزاز اور ریڈیئنٹ انسٹی ٹیوٹ میں منعقدہ خصوصی تقریب ڈاکٹر احسن زبیری کے ساتھ ساتھ پوری طبی برادری کے لیے باعثِ فخر ہے، جو ان کی محنت، اخلاص اور لگن کا روشن ثبوت ہے۔