ڈاکٹروں کے شدید احتجاج کے درمیان آر جے میڈیکل کالج کے پرنسپل نے استعفیٰ دے دیا

کولکاتہ، 12 اگستـ :کولکاتہ کے آر جی کار میڈیکل کالج اور اسپتال میں ایک خاتون ٹرینی ڈاکٹر کے مبینہ عصمت دری اور قتل پر ہنگامہ جاری ہے۔ دریں اثنا، میڈیکل کالج کے پرنسپل ڈاکٹر سندیپ گھوش نے پیر کو اپنے عہدے سے استعفیٰ دے دیا، انہوں نے احتجاج کرنے والے میڈیکل طلباء اور ہاؤس اسٹاف سے اپنا احتجاج واپس لینے کی اپیل کی ہے۔ ریذیڈنٹ ڈاکٹرز اپنے ساتھی کے مبینہ ریپ اور قتل کے بعد سے سراپا احتجاج ہیں۔ انہوں نے پرنسپل کے استعفیٰ کا مطالبہ کیا تھا۔ آج پرنسپل ڈاکٹر سندیپ گھوش نے استعفیٰ دے دیا ہے۔ اپنے استعفیٰ کا اعلان کرتے ہوئے ڈاکٹر سندیپ گھوش نے احتجاج کرنے والے میڈیکل طلباء اور ہاؤس اسٹاف سے اپیل کی کہ وہ اپنا احتجاج واپس لے لیں اور اسپتال میں معمول کا کام دوبارہ شروع کریں۔ ڈاکٹر سندیپ گھوش نے کہا، "میرا استعفیٰ طلبا کی خواہش تھی۔ درحقیقت پوری ریاست میرے استعفیٰ کا مطالبہ کر رہی تھی۔ مجھے امید ہے کہ میڈیکل کے طلبہ اور جونیئر ڈاکٹر اب اپنا معمول کا کام شروع کر دیں گے۔ پچھلے کچھ دنوں سے میرا خاندان اور مجھے بہت سارے تبصروں کا سامنا کرنا پڑا تو میں نے استعفیٰ دینے کا فیصلہ کیا۔ انہوں نے دعویٰ کیا کہ "وہ اپنے حریف گروپ کی جانب سے رچی گئی سیاسی سازش کا شکار ہیں۔ میں کبھی بھی کسی قسم کے سیاسی کھیل کا حصہ نہیں رہا، ایک سرکاری ملازم کی حیثیت سے میں آخری دم تک اپنا فرض ادا کروں گا۔” تاہم مظاہرین اپنے مطالبات کی منظوری تک احتجاج جاری رکھنے پر بضد ہیں۔ مظاہرین کا کہنا ہے کہ پرنسپل کی جانب سے استعفیٰ دینے کا محض زبانی اعلان کافی نہیں ہوگا۔ انہیں تحریری طور پر بھی یہ بات کہنا پڑے گا۔