چندر بابو نائیڈو کو 14 دن کی عدالتی تحویل

وجئے واڑہ: 11 ستمبر:300 کروڑ کے گھوٹالہ کے ملز م تیلگو دیشم پارٹی اور سابق چیف منسٹر چندرا بابو نائیڈو کو بدعنوانی کے معاملے میں 14 دن کی عدالتی حراست میں بھیج دیا گیا ہے۔ آج انہیں اینٹی کرپشن بیورو کی عدالت میں پیش کیا گیا۔ اس کے بعد وجئے واڑہ کی مقامی عدالت نے اسے 14 دن کی عدالتی حراست میں بھیجنے کا فیصلہ سنایا۔ نائیڈو پر اسکل ڈیولپمنٹ کارپوریشن گھوٹالہ کا الزام ہے۔سپریم کورٹ کے وکیل سدھارتھ لوتھرا اور وکلاء کا ایک گروپ آندھرا پردیش کے سابق وزیر اعلی چندرا بابو نائیڈو کی جانب سے مقدمہ لڑ رہے تھے۔ جب نائیڈو کی عدالتی تحویل کا فیصلہ سنایا گیا تو ان کی پارٹی کے قائدین اور کارکنان وہاں موجود تھے۔چندرا بابو نائیڈو سے کنچن پلی میں موجود سی آئی ڈی کے خصوصی تفتیشی گروپ نے دفتر میں تقریباً 10 گھنٹے تک پوچھ گچھ کی۔ آندھرا پردیش پولیس نے نائیڈو کو اسکل ڈیولپمنٹ کارپوریشن اسکام میں کلیدی سازش کار بتایا۔ الزام ہے کہ نائیڈو کے گھوٹالے سے حکومت کو 300 کروڑ روپئے کا نقصان ہوا ہے۔چندرا بابو نائیڈو کو عدالتی تحویل میں بھیجنے کے حکم کے فوراً بعد آندھرا پردیش پولیس نے احتیاطی اقدام کے طور پر ریاست بھر میں ریلیوں اور جلسوں پر پابندی لگا دی ہے۔ پولیس نے ریاست بھر میں سی آر پی سی کی دفعہ 144 نافذ کرنے کے احکامات جاری کئے۔ دفعہ 144جس میں چار یا اس سے زیادہ لوگوں کے جمع ہونے پر پابندی ہے، تمام بلاکس میں نافذ رہے گی۔ یہ احکامات واضح طور پر اپوزیشن تلگو دیشم پارٹی کے کسی بھی احتجاج کو روکنے کے لیے نافذ کیے گئے ہیں۔