چمولی میں مسلم کمیونٹی کے بائیکاٹ پر اویسی ناراض۔ کہا، ‘ہندوستان میں مسلمانوں کو اچھوت بنا دیا’

نئی دہلی، 20 اکتوبر:آل انڈیا مجلس اتحاد المسلمین (اے آئی ایم آئی ایم) کے قومی صدر اسد الدین اویسی نے اتراکھنڈ کے چمولی ضلع میں مسلم کمیونٹی کے بائیکاٹ کے حکم کے بعد سخت ردعمل ظاہر کیا ہے۔، اسد الدین اویسی نے سوشل میڈیا پلیٹ فارم پر ایک پوسٹ میں کہا کہ مسلمانوں کو چمولی چھوڑنا پڑے گا اگر زمیندار مسلمانوں کو مکان دیتے ہیں تو انہیں 10،000 روپے کا جرمانہ ادا کرنا پڑے گا۔ انہوں نے مزید کہا، "یہ وہی اتراکھنڈ ہے جہاں حکومت مساوات کے نام پر یکساں سول کوڈ کو نافذ کر رہی ہے۔ کیا چمولی کے مسلمانوں کو برابری اور عزت کے ساتھ جینے کا حق نہیں ہے؟ مودی اگر عرب شیخوں کو گلے لگا سکتا ہے تو چمولی کے مسلمانوں کو بھی گلے لگا سکتا ہے۔ آخر کار مودی سعودی یا دبئی کے نہیں ہندوستان کے وزیر اعظم ہیں۔” میڈیا رپورٹس کے مطابق چمولی کے گاؤں میتھن کے لوگوں نے مسلم کمیونٹی کے گاؤں میں داخلے پر پابندی لگا دی ہے اور وہاں رہنے والے 15 مسلم خاندانوں کے بڑے پیمانے پر بائیکاٹ کا حکم دیا ہے۔ انہوں نے کہا کہ وہ 31 دسمبر تک گاؤں چھوڑ دیں، بدھ کو مقامی لوگوں اور میتھن بورڈ کی جانب سے 15 مسلم خاندانوں کا اجتماعی بائیکاٹ کرنے کا فیصلہ کیا گیا۔