پی ایم مودی نے مہاراشٹرمیں کئی پروجیکٹوں کا افتتاح اور سنگ بنیاد رکھا

ممبئی:29 ستمبر:وزیر اعظم نریندر مودی نے اتوار کو ویڈیو کانفرنسنگ کے ذریعے پونے میٹرو کے پہلے مرحلے (فیز-1) اور اپ گریڈ شدہ سولاپور ہوائی اڈے سمیت مختلف پروجیکٹوں کا افتتاح اور سنگ بنیاد رکھا۔ پونے اور آس پاس کے علاقوں میں شدید بارش کی وجہ سے پی ایم مودی نے ریاست کا اپنا دورہ منسوخ کر دیا تھا۔ اس موقع پر اپنے خطاب میں پی ایم مودی نے کہا کہ یہ پروجیکٹ شہری ترقی کو فروغ دیں گے اور لوگوں کی زندگی کو آسان بنانے میں اہم کردار ادا کریں گے۔ پی ایم مودی نے پونے میٹرو ریل پروجیکٹ (فیز-1) کی تکمیل پر ڈسٹرکٹ کورٹ سے سوارگیٹ تک پونے میٹرو سیکشن کا افتتاح کرتے ہوئے کہا کہ اب اس روٹ پر میٹرو ٹرینیں چلیں گی۔ زیر زمین سیکشن کی لاگت تقریباً 1,810 کروڑ روپے ہے۔ اس کے علاوہ وزیر اعظم نے پونے میٹرو فیز-1 کے سوارگیٹ-کٹراج ایکسٹینشن کا سنگ بنیاد رکھا۔ جس کی لاگت تقریباً 2,955 کروڑ روپے ہوگی۔ یہ 5.46 کلومیٹر طویل جنوبی توسیع مکمل طور پر زیر زمین ہے اور اس میں تین اسٹیشن ہوں گے، مارکیٹ یارڈ، پدماوتی اور کٹراج۔ پونے کے بھیدے واڑہ میں کرانتی جیوتی ساوتری بائی پھولے کے پہلے گرلز اسکول کی یادگار کا سنگ بنیاد رکھتے ہوئے پی ایم مودی نے کہا کہ ملک کی آزادی سے پہلے سماجی حالات ایسے تھے کہ غریبوں کے ساتھ امتیازی سلوک کیا جاتا تھا۔ ایسے میں لڑکیوں کے لیے تعلیم حاصل کرنا بہت مشکل تھا۔ ساوتری بائی پھولے ان نامور لوگوں میں سے ایک تھیں جنہوں نے لڑکیوں کے لیے تعلیم کے دروازے کھولے۔ اس کے علاوہ پی ایم مودی نے سولاپور ایئرپورٹ کا بھی افتتاح کیا۔ اس سے کنیکٹیویٹی میں بہتری آئے گی، سولاپور کو سیاحوں، کاروباری مسافروں اور سرمایہ کاروں کے لیے مزید قابل رسائی بنائے گا۔ انہوں نے کہا کہ ٹرمینل کی موجودہ عمارت کی تزئین و آرائش کی گئی ہے تاکہ سالانہ تقریباً 4.1 لاکھ مسافروں کی خدمت کی جا سکے۔