پٹھان شریف خان کو مہاراشٹر اسٹیٹ اردو ساہتیہ اکادمی کی جانب سے مثالی ٹیچر ایوارڈ

ممبئی:3؍اکتوبر (نامہ نگار ):پیپلس اردو پرائمری اسکول، پینش پورہ جالنہ کے اسسٹنٹ ٹیچر پٹھان شریف خان کو مہاراشٹر اسٹیٹ اردو ساہتیہ اکادمی کی جانب سے سال 2021ء کا مثالی معلم ایوارڈ دیے جانے کا اعلان کیا گیا ہے۔اکادمی کی جانب سے جاری کردہ پریس ریلیز میں سال 2021ء، 2022ء اور 2023ء کے ایوارڈ یافتگان کی فہرست شائع کی گئی ہے، جن میں پٹھان شریف خان کا نام بھی شامل ہے۔ اس سے قبل بھی انہیں کئی اداروں کی جانب سے مثالی معلم ایوارڈ سے نوازا جا چکا ہے۔پٹھان شریف خان نہ صرف تدریسی خدمات میں نمایاں مقام رکھتے ہیں بلکہ صحافت کے میدان میں بھی سرگرم ہیں۔ وہ مختلف اردو اخبارات میں مضامین تحریر کرتے ہیں، اساتذہ کے ورکشاپس میں بطور صاحبِ وسائل خدمات انجام دے چکے ہیں اور طلبہ و طالبات کی تعلیمی ترقی کے لیے ہمہ وقت کوشاں رہتے ہیں۔اس موقع پر دوست و احباب نے پٹھان شریف خان کو دلی مبارکباد پیش کرتے ہوئے نیک خواہشات کا اظہار کیا ہے۔ وہ ایک متحرک اور فعال ٹیچر ہیں جو مختلف تعلیمی سرگرمیوں میں بڑھ چڑھ کر حصہ لیتے ہیں۔