پر بھنی کے نوجوان کی موت کا معاملہ: ناندیڑ میں مکمل بند، ایس ٹی خدمات معطل

ناندیڑ: 16؍دسمبر ( نمائندہ اعتبار) پر بھنی شہر میں بھارتی آئین کی نقل کی بے حرمتی کا واقعہ پیش آیا تھا۔ اس کے بعد ہونے والے احتجاج میں شامل ایک نوجوان کی حراست کے دوران موت ہوگئی۔ اس واقعہ کے خلاف اور قصوروار پولیس افسران کے خلاف کارروائی کے مطالبے پر امبیڈکر تنظیموں کی جانب سے مظاہرے کرتے ہوئے پیر کو ناندیڑ شہر میں مکمل بند رکھا گیا۔ تاجروں نے بند میں شامل ہوکر تعاون کیا، جبکہ احتیاطی تدابیر کے طور پر ایس ٹی کارپوریشن نے مسافر ٹرانسپورٹ سروس بند رکھی۔پر بھنی میں بھارت رتن ڈاکٹر باباصاحب امبیڈکر کے مجسمے کے قریب بھارتی آئین کی نقل کی سماج دشمن عناصر نے بے حرمتی کی تھی، جس کی وجہ سے غصے کا ماحول پیدا ہوگیا تھا۔ شہر میں پتھراؤ اور آتش زنی کے واقعات ہوئے تھے۔ ناندیڑ شہر اور ضلع میں مختلف سیاسی و سماجی تنظیموں نے اس واقعے کی مذمت کی۔دریں اثنا پر بھنی میں احتجاج کے دوران شامل نوجوان کو پولیس نے گرفتار کیا تھا، لیکن عدالتی حراست کے دوران سوم ناتھ سوریہ ونشی کی موت ہوگئی، جس کے بعد ایک بار پھر کشیدگی کا ماحول پیدا ہوگیا۔ اتوار کی صبح بھی ناندیڑ شہر کے کچھ علاقوں کے تاجروں نے خوف کے مارے اپنی دکانیں بند کردیں۔پولیس سپرنٹنڈنٹ ابیناش کمار نے خود شہر کا دورہ کیا اور شہریوں و تاجروں سے بات چیت کرتے ہوئے امن قائم رکھنے کی اپیل کی، جس کے بعد بازار معمول پر آگئے۔ بعد ازاں سوریہ ونشی کی حمایت میں امبیڈکر تنظیموں نے پیر کو مہاراشٹر بند کا اعلان کیا، جس پر مکمل عمل کیا گیا۔شہر کے آئی ٹی آئی چوک پر امبیڈکر کے پیروکاروں اور ریپبلکن سینا کے کارکنوں نے پر بھنی پولیس کے خلاف شدید مظاہرہ کرتے ہوئے نعرے بازی کی۔ اس موقع پر مطالبہ کیا گیا کہ پر بھنی کے واقعے میں ملوث قصوروار پولیس افسران کے خلاف کارروائی کی جائے۔شہر کے تاجروں نے بھی اپنی دکانیں اور کاروباری مراکز بند رکھ کر بند میں حصہ لیا۔ وزیرآباد، کلا مندر، شیواجی نگر، پھلے مارکیٹ، آئی ٹی آئی چوک، شری نگر، مونڈھا، سڈکو اور ہڈکو کے علاقے مکمل بند رہے۔ تاجروں کی شمولیت کی وجہ سے ناندیڑ بند پر امن طریقے سے اختتام پذیر ہوا۔احتیاطی تدابیر کے طور پر ایس ٹی کارپوریشن نے مسافروں کی ٹرانسپورٹ سروس بند رکھی تھی۔ امن و امان برقرار رکھنے اور بند کو پرامن طریقے سے مکمل کرنے کے لیے اسپیشل پولیس ڈپٹی انسپکٹر جنرل شہاجی اُماپ کی رہنمائی میں پولیس سپرنٹنڈنٹ ابیناش کمار، ایڈیشنل پولیس سپرنٹنڈنٹ سورج گرو، اسسٹنٹ پولیس سپرنٹنڈنٹ کیرتیکا، اور ڈپٹی سپرنٹنڈنٹ سشیل کمار نائیک و دیگر افسران نے معقول بندوبست کیا۔