پتنجلی کے گمراہ کن اشتہارات: سپریم کورٹ نے بابا رام دیو اور آچاریہ بال کرشن کو طلب کیا

نئی دہلی: 19 مارچ:سپریم کورٹ نے منگل کو یوگا گرو بابا رام دیو اور پتنجلی آیوروید کے منیجنگ ڈائریکٹر آچاریہ بال کرشنا کو طلب کیا۔ جسٹس ہیما کوہلی کی سربراہی والی بنچ نے کہا کہ آیورویدک کمپنی پتنجیل نے گمراہ کن اشتہارات کی مسلسل اشاعت پر جاری توہین عدالت نوٹس کا جواب نہیں دیا۔ 27 فروری کو بنچ نے گزشتہ سال نومبر میں سپریم کورٹ کے سامنے دی گئی یقین دہانی کی خلاف ورزی کرنے پر آچاریہ بال کرشنا اور پتنجلی کے خلاف توہین عدالت کی کارروائی شروع کی تھی۔ بنچ میں جسٹس احسن الدین امان اللہ بھی شامل تھے۔ پتنجلی نے قبل ازیں سپریم کورٹ کو یقین دلایا تھا کہ وہ اپنی مصنوعات کی دواؤں کی افادیت کا دعویٰ کرنے والا کوئی بیان نہیں دے گا یا قانون کی خلاف ورزی کرتے ہوئے ان کی تشہیر یا برانڈ نہیں کرے گا اور میڈیا کی کسی بھی شکل میں دوا کے کسی نظام کے خلاف کوئی بیان جاری نہیں کرے گا۔ اپنی عرضی میں، انڈین میڈیکل ایسوسی ایشن نے پتنجلی کے خلاف ڈرگس اینڈ میجک ریمیڈیز (قابل اعتراض اشتہارات) ایکٹ 1954 کی خلاف ورزی پر کارروائی کی مانگ کی ہے۔ یوگا گرو اور پتنجلی کے بانی بابا رام دیو کے خلاف کووڈ-19 کے ایلوپیتھک علاج کے خلاف متنازعہ تبصروں کے لیے کئی ریاستوں میں مقدمات درج کیے گئے ہیں۔ ایک ویڈیو میں بابا رام دیو نے کہا تھا کہ ’’آکسیجن یا بیڈ کی کمی سے زیادہ لوگ ایلوپیتھک ادویات کے استعمال کی وجہ سے مرے ہیں۔‘‘