پاکستان زندہ باد کا نعرہ لگانے والے ملزم کی ضمانت پر ہائیکورٹ نے انوکھی شرط لگا دی

بھوپال:17 اکتوبر:ـمئی کے مہینے میں مدھیہ پردیش میں ایک ویڈیو وائرل ہوئی تھی جس میں فیصل خان عرف فیضان نامی نوجوان کو پاکستان زندہ باد اور بھارت مردہ باد کے نعرے لگاتے ہوئے دیکھا گیا تھا۔ اس معاملے میں پولیس نے نوجوان کو گرفتار کرکے جیل بھیج دیا تھا، جسے آج ہائی کورٹ نے مشروط ضمانت دے دی۔ جبل پور ہائی کورٹ نے جمعرات کو فیصل خان کو مشروط ضمانت دے دی۔ ایڈوکیٹ ہاشم خان نے کہا کہ جسٹس دنیش کمار پالیوال نے فیصل کو ہدایت کی ہے کہ انہیں کیس ختم ہونے تک ہر ماہ کے پہلے اور چوتھے منگل کو مسرود پولیس اسٹیشن بھوپال میں حاضر ہونا پڑے گا۔ عدالتی حکم کے مطابق فیصل کو ترنگے کے سامنے کھڑے ہو کر 21 بار سلامی دینا ہوگی اور ساتھ ہی بھارت ماتا کی جئے کا نعرہ بھی لگانا ہوگا۔ انہوں نے بتایا کہ نوجوانوں کو ہر ماہ کے پہلے اور چوتھے منگل کو صبح 10 بجے سے دوپہر 12 بجے کے درمیان پولیس اسٹیشن پہنچ کر یہ عمل مکمل کرنا ہوگا۔ انہیں 50 ہزار روپے کے مچلکوں پر ضمانت دی گئی ہے۔ عدالت نے بھوپال کمشنر کو بھی اس عمل کے لیے ضروری انتظامات کرنے کی ہدایت دی ہے۔ اس معاملے کی جانکاری دیتے ہوئے مسرود پولیس اسٹیشن انچارج منیش راج بھدوریا نے بتایا کہ فیصل کے خلاف ملک مخالف نعرے لگانے پر مقدمہ درج کیا گیا تھا۔ نوجوان نے ملک مخالف نعرے لگائے تھے جس کے بعد اسے گرفتار کر کے عدالت میں پیش کیا گیا اور پھر جیل بھیج دیا گیا۔ اب ہائی کورٹ نے ان کی ضمانت منظور کرتے ہوئے یہ شرط عائد کی ہے کہ نوجوانوں کو تھانے آکر قومی پرچم کو سلامی دینا ہوگی اور بھارت ماتا کی جئے کہنا ہوگا۔ ان کا مزید کہنا تھا کہ تھانے میں قومی پرچم لہرانے کا انتظام ہے۔ اب نوجوانوں کو ہر ماہ کے پہلے اور چوتھے منگل کو تھانہ مسرود آکر قومی پرچم کو سلامی دینا ہوگی۔