وراثت

ابو کے انتقال کے بعد ان کی جیب سے برآمد ہونے والا دس روپے کا نوٹ میرے لیے محض کاغذ کا ٹکڑا نہیں رہا، وہ ان کی پوری زندگی کی مہر بن چکا تھا۔
انہوں نے خود بھوک برداشت کی، مجھے تعلیم دی، اور اپنی محنت سے مجھے استاد بنایا۔
وقت بدلا، ذمہ داریاں بڑھیں۔
نان گرانٹ اسکول کی کم تنخواہ، نئی شادی، اور پھر گود میں ننھا سا علی۔
ایک دن علی کو لے کر رکشے میں بیٹھا، منزل پر پہنچ کر جیب ٹٹولی تو خاموشی بولنے لگی۔
سوائے اس دس کے نوٹ کے کچھ نہ تھا۔
لرزتے ہاتھ سےوہ نوٹ نکالا،
ایک لمحہ آنکھوں سے لگایا،
اور رکشے والے کو تھما دیا۔
رکشہ روانہ ہوا تو کانوں میں ابو کی آواز گونجی:
’’بیٹا، باپ کی اصل وراثت جیب میں نہیں، کردار میں چھپی ہوتی ہے۔‘‘