نوین پٹنائک نے اڈیشہ کے وزیراعلیٰ کے عہدے سے استعفیٰ دے دیا

بھونیشور: 5 جون۔اوڈیشہ کے وزیر اعلیٰ نوین پٹنائک نے بدھ کو گورنر رگھوبر داس سے ملاقات کی اور اسمبلی انتخابات میں پارٹی کی شکست کے بعد اپنا استعفیٰ پیش کر دیا، سی ایم پٹنائک اپنے دو دہائیوں سے زیادہ طویل سیاسی کیریئر میں پہلی بار اسمبلی میں اپوزیشن بنچ پر بیٹھیں گے۔ پٹنائک بدھ کی صبح گورنر ہاؤس گئے اور اپنا استعفیٰ پیش کیا۔ اس کے بعد پٹنائک کی رہائش گاہ پر پارٹی کے سینئر لیڈروں کی میٹنگ ہوئی۔جس میں مستقبل کی حکمت عملی پر تبادلہ خیال کیا گیا۔ پٹنائک نے پہلی بار 5 مارچ 2000 کو اڈیشہ کے وزیر اعلی کے طور پر حلف لیا تھا۔ پھر ان کی پارٹی ان کے والد اور سابق وزیر اعلی بیجو پٹنائک کی مقبولیت پر سوار ہو کر اقتدار میں آئی۔ نوین پٹنائک 24 سال اقتدار میں رہنے کے بعد وزیر اعلیٰ کا عہدہ چھوڑ دیں گے۔ ان کا چھٹی بار وزیر اعلیٰ بننے کا خواب حکومت مخالف لہر کی وجہ سے چکنا چور ہو گیا۔ اس بار بی جے ڈی کو صرف 51 سیٹیں مل سکیں، جب کہ 2019 کے اسمبلی انتخابات میں اسے 112 سیٹیں ملی تھیں۔ بھارتیہ جنتا پارٹی نے 147 رکنی اسمبلی میں 78 سیٹیں جیت کر بی جے ڈی سے اقتدار چھین لیا ہے۔