نوکری مانگنے والے نہیں بلکہ نوکری دینے والے بنیں : وزیر مملکت میگھنا بورڈیکر

ناندیڑ:28 جنوری(نمائندہ اعتبار) بیروزگار نوجوانوں کو اپنا اسٹارٹ اپ شروع کرنے کے لیے حکومت ہر ممکن مدد کرے گی، یہ یقین دہانی وزیر مملکت میگھنا بورڈیکر نے آج یہاں دی۔شری گرو گووند سنگھ جی انجینئرنگ کالج میں منعقدہ دیویندر فڈنویس اسٹارٹ اپ مشن کے تحت ایک روزہ ورکشاپ کے افتتاحی پروگرام کے لیے بورڈیکر ناندیڑ کے دورے پر آئیں۔اس پروگرام میں وائس چانسلر ڈاکٹر منوہر چاسکر، سابق وزیر اعلیٰ و رکن پارلیمنٹ اشوک چوہان، رکن پارلیمنٹ ڈاکٹر اجیت گوپچھڑے، رکن اسمبلی آنند راؤ بونڈارکر، پولیس سپرنٹنڈنٹ ابیناش کمار، ڈاکٹر منیش کوکرے، بابا بلویندر سنگھ، بابا سکھویندر سنگھ، ستیس لوسنوتھ، ونیل چندر رنگا نے شرکت کی۔اس موقع پر وزیر موصوفہ نے مثالی اسٹارٹ اپ کے طور پر فلیپ کارٹ، پے ٹی ایم، زوماٹو، سوئیگی، اویو، اولا، نائیکا جیسے اسٹارٹ اپ کی مثال دے کر نوجوانوں کو ترغیب دی۔ انہوں نے مزید کہا’’”بھارت دنیا کا تیسرا سب سے بڑا اسٹارٹ اپ ایکو سسٹم بن کر ابھرا ہے۔ ملک ایک ترقی یافتہ قوم بننے کے لیے تیار ہو رہا ہے۔ بھارت میں اس وقت 1.25 لاکھ سے زیادہ اسٹارٹ اپس اور 110 یونی کارن اسٹارٹ اپس ہیں، جن کی مالیت 8 ہزار کروڑ روپئے سے زیادہ ہے۔بھارتی اسٹارٹ اپس نئی صنعتوں میں انقلاب برپا کر رہے ہیں اور ملکی معیشت کی بنیاد بن رہے ہیں۔ اسٹارٹ اپ کے ذریعے نوجوان نسل کی سوچ میں تبدیلی آ رہی ہے۔ نوکری تلاش کرنے والے نوجوان اب نوکری دینے والے بننے کے لیے پرجوش ہیں۔بھارت حکومت کے نیشنل کوانٹم مشن، انڈیا اے آئی مشن اور سیمی کنڈکٹر مشن جیسے اقدامات نے نوجوانوں کے لیے مواقع کے دروازے کھول دیے ہیں۔ ہمارے ریاست میں بھی اسٹارٹ اپ ایکو سسٹم صرف میٹرو شہروں تک محدود نہیں ہے، بلکہ اب یہ ایک سماجی ثقافت بن رہی ہے۔ مصنوعی ذہانت کے ذریعے ملک میں اسٹارٹ اپ کے بے شمار مواقع پیدا ہو رہے ہیں اور عالمی سرمایہ کار بھارت آنے کے لیے بے چین ہیں۔انہوں نے کہا کہ اگر ہمیں مہاراشٹر کی معیشت کو ایک ٹریلین ڈالر سے زیادہ بنانا ہے تو اسٹارٹ اپس کا سب سے اہم کردار ہوگا۔ اس کے لیے ضروری ہے کہ صحیح تربیت اور درکار بنیادی سہولتیں فراہم کی جائیں۔مہاراشٹر کے چھوٹے شہروں میں ابھرتے ہوئے نوجوان کاروباریوں کو اسٹارٹ اپ سے متعلق مناسب رہنمائی نہیں ملتی۔ اس وجہ سے اسٹارٹ اپ کو فروغ دینے کے لیے شروع کی جانے والی مختلف اسکیموں کے فوائد کاروباریوں تک نہیں پہنچ پاتے۔ مراٹھواڑہ میں بیروزگاری کی شرح زیادہ ہے۔ یہاں کے نوجوانوں میں اپنا کاروبار شروع کرنے کی صلاحیت موجود ہے، لیکن انہیں اسٹارٹ اپ شروع کرنے کے لیے مناسب تربیت دستیاب نہیں۔اسی لیے مراٹھواڑہ کے نوجوانوں کو اسٹارٹ اپ شروع کرنے کے لیے مکمل رہنمائی فراہم کرنے کے مقصد سے وشوجیت دیشمکھ اور ڈاکٹر سجات دیشمکھ نے یہ مشن شروع کیا ہے۔اس مشن کے ذریعے مراٹھواڑہ کے نوجوانوں کو اسٹارٹ اپ شروع کرنے کے لیے رہنمائی فراہم کی جائے گی۔ اسٹارٹ اپ شروع کرنے کے لیے حکومت کس طرح مدد کرے گی، اس پر بھی نوجوانوں کو رہنمائی دی جائے گی۔ وزیر اعلیٰ دیویندر فڈنویس بھی نوجوانوں کے اسٹارٹ اپ کے لیے بہت سرگرم ہیں، یہ بات انہوں نے نوجوانوں سے خطاب کرتے ہوئے واضح کی۔