ننھے روزہ داروں کا عظیم حوصلہ

ناندیڑ:2؍مارچ ( راست) قدیم عید گاہ ناندیڑ کے قادری فیملی کے تین ننھے پھول، انشراح ماہین ،انشراح کشف اور المیرا فاطمہ نے اس رمضان میں اپنی زندگی کا پہلا روزہ رکھا۔ ان معصوم بچوں کی اس دینی لگن نے نہ صرف ان کے والدین بلکہ پورے خاندان کو خوشی کا احساس دلایا۔یہ ننھے روزہ دار سحری کے وقت بڑے جوش و خروش کے ساتھ بیدار ہوئے اور اپنے گھر والوں کے ساتھ سحری کھانے کی سعادت حاصل کی۔ دن بھر صبر و استقامت کے ساتھ روزہ رکھ کر شام کے وقت جب انہوں نے افطار کیا تو ان کی خوشی اور مسکراہٹ دیکھنے لائق تھی۔ گھر کے تمام افراد نے ان کی اس حوصلہ مندی کو سراہا اور ان کے پہلے روزے کی خوشی میں ایک یادگار محفل سجائی۔بچپن میں ہی عبادات سے جُڑنے اور اسلامی شعائر کو اپنانے کی یہ خوبصورت مثال اس بات کا ثبوت ہے کہ دین کی محبت دلوں میں رچ بس جائے تو عمر کی کوئی قید نہیں رہتی۔ یہ معصوم کلیاں جو آج پہلا روزہ رکھ کر خوشی سے سرشار ہیں، کل دین کے روشن چراغ بن کر جگمگائیں گی، ان شاء اللہ ۔