ننھی روزہ دارتنزیلہ فاطمہ کا عظیم حوصلہ

ناندیڑ :22؍مارچ ( راست)دُلہے شاہ رحمن نگر، ناندیڑ کے ساکن عبدالقیوم صدیقی کی لخت جگر تنزیلہ فاطمہ نے محض 9سال کی عمر میں اپنی زندگی کا پہلا روزہ رکھا۔ اس معصوم بچی کی اس دینی لگن نے نہ صرف ان کے والدین بلکہ پورے خاندان کو خوشی کا احساس دلایا۔یہ ننھی روزہ دار سحری کے وقت بڑے جوش و خروش کے ساتھ بیدار ہوئی اور اپنے گھر والوں کے ساتھ سحری کھانے کی سعادت حاصل کی۔ دن بھر صبر و استقامت کے ساتھ روزہ رکھ کر شام کے وقت جب انہوں نے افطار کیا تو ان کی خوشی اور مسکراہٹ دیکھنے لائق تھی۔ گھر کے تمام افراد نے اس کی اس حوصلہ مندی کو سراہا اور اس کے پہلے روزے کی خوشی میں گلپوشی کی اور اپنی دعا ؤں سے نوازا۔ بچپن میں ہی عبادات سے جُڑنے اور اسلامی شعائر کو اپنانے کی یہ خوبصورت مثال اس بات کا ثبوت ہے کہ دین کی محبت دلوں میں رچ بس جائے تو عمر کی کوئی قید نہیں رہتی۔ یہ معصوم کلی جو آج پہلا روزہ رکھ کر خوشی سے سرشار ہیں، کل دین کا روشن چراغ بن کر جگمگائے گی، ان شاء اللہ ۔