ناندیڑ پولیس دستے میں موبائل فرانزک وین کا آغاز

ناندیڑ: 8؍اکتوبر(نمائندہ اعتبار)سنگین نوعیت کے جرائم جیسے قتل، عصمت دری اور دیگر سنگین وارداتوں میں اکثر ثبوتوں کی عدم دستیابی یا شکایت کنندگان و گواہوں کے منحرف ہو جانے کے باعث ملزمین کے چھوٹ جانے کے واقعات پیش آتے رہے ہیں۔ اس مسئلے پر قابو پانے کے لیے ریاستی حکومت نے ایک بڑا فیصلہ کیا ہے۔ نئے قانون کے تحت اب سات سال یا اس سے زیادہ سزا والے جرائم کی تحقیقات میں فرانزک شواہد کا استعمال لازمی قرار دیا گیا ہے۔ اسی مقصد سے پورے مہاراشٹر کے پولیس دستوں میں فرانزک موبائل وینیں شروع کی جا رہی ہیں۔اسی سلسلے میں آج 8؍اکتوبر 2025 کو بھوکر ڈویژن کے لیے ناندیڑ پولیس دستے میں فرانزک موبائل وین کو شامل کیا گیا۔ اس وین کو ناندیڑ کے پولیس سپرنٹنڈنٹ جناب ابیناش کمار، ایڈیشنل ایس پی جناب سورج گروو، اور ڈپٹی ایس پی ڈاکٹر اشونی جگتاپ (کندھار) نے ہری جھنڈی دکھا کر باضابطہ طور پر شروع کیا۔اس فرانزک وین میں جدید کیمیائی تجزیاتی آلات، ڈی این اے اور خون کے نمونوں کی جانچ کے کٹس، اور ڈیجیٹل شواہد جمع کرنے کے لیے تمام ضروری سہولیات دستیاب ہیں۔ یہ وین 24 گھنٹے کام کرے گی، جس میں اسسٹنٹ کیمیکل اینالسٹ، سائنسی آفیسر اور لیبارٹری اسسٹنٹ جیسے ماہر فرانزک افسران تعینات رہیں گے۔موبائل فرانزک وین کی مدد سے جائے وقوعہ پر فوراً تفتیش شروع کی جا سکے گی اور ابتدائی نتائج بھی موقع پر ہی حاصل کیے جا سکیں گے۔ اس سے وقت کی بچت ہوگی، ثبوتوں کے ساتھ چھیڑ چھاڑ کے امکانات کم ہوں گے، اور اصل شواہد پولیس کے ہاتھ لگیں گے۔ نتیجتاً تفتیشی عمل میں تیزی آئے گی، عدالتی کارروائی میں شکوک و شبہات کی گنجائش نہیں رہے گی، اور فرانزک جانچ کے بڑھتے استعمال سے انصاف کی فراہمی میں شفافیت اور رفتار دونوں میں اضافہ ہوگا۔