ناندیڑ میں 31 جولائی سے 14 اگست تک جمع و اسلحہ بندی نافذ

ناندیڑ:30 ؍جولائی (نمائندہ اعتبار) ناندیڑ ضلع میں 31 جولائی کی صبح 6 بجے سے لے کر 14 اگست 2025 ءکی رات 12 بجے تک جمع بندی (دفعہ 144) اور اسلحہ رکھنے پر پابندی کا حکم نافذ کردیا گیا ہے۔ یہ اطلاع ایڈیشنل ضلع مجسٹریٹ کے دفتر سے جاری کی گئی ہے۔ضلع میں امن و امان قائم رکھنے کی غرض سے مہاراشٹر پولیس ایکٹ 1951 کی دفعہ 37 (1) اور (3) کے تحت یہ فیصلہ لیا گیا ہے۔ اس مدت کے دوران عوامی مقامات پر پانچ یا اس سے زائد افراد کے جمع ہونے اور بعض مخصوص افعال انجام دینے پر پابندی عائد رہے گی۔واضح رہے کہ یہ حکم سرکاری افسران، پولیس اہلکاروں، شادی بیاہ، جنازے، مذہبی تقریبات اور ان جلوسوں پر لاگو نہیں ہوگا جنہیں مجاز افسر کی جانب سے پیشگی اجازت حاصل ہو۔اسی طرح کسی بھی جلسہ، جلوس، ریلی، مارچ یا لاوڈ اسپیکر کے استعمال کی اجازت دینے کا اختیار متعلقہ تھانہ انچارج اور سپرنٹنڈنٹ آف پولیس ناندیڑ کی طرف سے نامزد پولیس افسران کے پاس ہوگا۔