ناندیڑ میں غیر قانونی گاڑیوں پر کارروائی، 389 کیسز، 5 لاکھ 30 ہزار 700 روپئے جرمانہ وصول

ناندیڑ:12؍اپریل ( نمائندہ اعتبار) شہر کی ٹریفک برانچ (وزیرآباد اور اتوارہ) کی جانب سے غیر قانونی مسافر برداری، بغیر لائسنس یا پرمٹ کے چلنے والی گاڑیاں اور یونیفارم نہ پہننے والے رکشہ ڈرائیوروں کے خلاف زور دار کارروائی کرتے ہوئے مجموعی طور پر 389 کیس درج کیے گئے اور 5 لاکھ 30 ہزار 700 روپئے کا جرمانہ وصول کیا گیا۔ناندیڑ کے پولیس سپرنٹنڈنٹ ابیناش کمار نے شہر میں بڑھتی ہوئی ٹریفک کی پریشانیوں پر قابو پانے کے لیے یہ مہم شروع کرنے کے احکامات دیے تھے، جس کے تحت غیر قانونی مسافر برداری، بغیر لائسنس یا پرمٹ کے چلنے والی گاڑیاں، تیز رفتاری سے چلنے والی گاڑیاں، اور یونیفارم نہ پہننے والے رکشہ ڈرائیوروں پر سخت کارروائی کرنے کی ہدایت دی گئی تھی۔اسی سلسلے میں 11 اپریل 2025 ء کو انچارج آفیسر صاحب راؤ گٹے(پولیس انسپکٹر، ٹریفک برانچ وزیرآباد )نے اپنی ٹیم کے ساتھ وزیر آباد چوک، ریلوے اسٹیشن، مہارانا پرتاپ چوک، تروڑیکر مارکیٹ اور کلامندر علاقوں میں کارروائی کرتے ہوئے درج ذیل کیسز درج کیے۔
ٹرپل سیٹ سواریاں – 21 کیسز، جرمانہ: 21,000 روپئے۔
یونیفارم نہ پہننے والے رکشہ ڈرائیور – 52 کیسز، جرمانہ: 44,000 روپئے۔
پرانے، غیر ادا شدہ کیسز – 195 کیسز، جرمانہ: 3 لاکھ 30 ہزار 250 روپئے۔
ای-چالان کے ذریعے ادا شدہ – 11 کیسز، جرمانہ: 8,250 روپئے۔
آن لائن چالان – 7 کیسز، جرمانہ: 14,950 روپئے۔
وزیر آباد ٹریفک برانچ نے کل 286 کیسز میں 4 لاکھ 18 ہزار 450 روپئے کا جرمانہ وصول کیا۔
اسی دن یعنی 11 اپریل کو، انچارج آفیسر جگن ناتھ پوار، پولیس انسپکٹر، ٹریفک برانچ اتوارہ نے اپنی ٹیم کے ساتھ دیگلور ناکہ، قدیم مونڈھا اور بافنا ٹی پوائنٹ پر مہم کے دوران گاڑیوں کے کاغذات کی جانچ، بغیر لائسنس یا پرمٹ چلنے والی گاڑیاں، تیز رفتار گاڑیاں، اور یونیفارم نہ پہننے والے رکشہ ڈرائیوروں پر کارروائی کرتے ہوئے 103 کیسز درج کیے اور 1 لاکھ 12 ہزار 250 روپئے جرمانہ وصول کیا۔ٹریفک برانچ وزیر آباد و اتوارہ کی اس مشترکہ مہم میں غیر قانونی مسافر برداری اور قواعد کی خلاف ورزی کرنے والوں کے خلاف مجموعی طور پر 389 کیسز درج کیے گئے اور 5 لاکھ 30 ہزار 700 روپئے جرمانہ وصول کیا گیا۔یہ کارروائی پولیس سپرنٹنڈنٹ ابیناش کمار اور ایڈیشنل ایس پی سورج گرو کی رہنمائی میں عمل میں لائی گئی، جس میں وزیر آباد اور اتوارہ کے افسران و ملازمین نے بھرپور شرکت کی۔