ناندیڑ لوک سبھا ضمنی انتخاب میں کانگریس کے امیدوار رویندر چوہان محض1457 کے فرق سے کامیاب

ناندیڑ:23 نومبر(نامہ نگار) : ناندیڑ لوک سبھا ضمنی انتخاب میں کانگریس کے امیدوار رویندر وسنت راؤ چوہان نے بھارتیہ جنتا پارٹی کے امیدوار ڈاکٹر سنتوکراؤ ماروت راؤ ہمبرڈے کو 1457 ووٹوں سے شکست دی ہے۔ چھ مہینے قبل کانگریس کے رکن پارلیمنٹ وسنت راؤ چوہان کے انتقال کے بعد یہ نشست خالی ہوئی تھی۔ ان کے بیٹے رویندر وسنت راؤ چوہان نے سخت مقابلے میں یہ نشست برقرار رکھی ہے۔الیکشن کمیشن آف انڈیا کی جانب سے اعلان کردہ ضمنی انتخاب میں کیرالہ کی وایناڈ اور مہاراشٹر کی ناندیڑ لوک سبھا نشست کے لیے انتخابات کی تاریخ دی گئی تھی۔ 25 سال بعد ناندیڑ میں ایک ہی وقت میں لوک سبھا اور اسمبلی انتخابات منعقد ہوئے، جس کی وجہ سے بڑی تعداد میں ووٹنگ ہوئی۔ پچھلی بار لوک سبھا انتخابات میں 61 فیصد ووٹنگ ہوئی تھی، لیکن اس بار ضمنی انتخاب میں 67.81 فیصد ووٹنگ درج کی گئی۔ آخری چند مراحل میں رویندر چوہان نے برتری حاصل کرتے ہوئے یہ نشست کانگریس کے پاس برقرار رکھی۔ رویندر چوہان کو 5 لاکھ 86 ہزار 788 ووٹ ملے، جبکہ ڈاکٹر سنتوکراؤ ہمبرڈے کو 5 لاکھ 85 ہزار 331 ووٹ حاصل ہوئے۔ ونجیت بہوجن اگھاڑی کے اویناش وشناتھ بھوسیکر 80 ہزار 179 ووٹوں کے ساتھ تیسرے نمبر پر رہے۔اس دوران، پہلے ہی مرحلے سے سخت مقابلے والے اس انتخاب میں ای وی ایم ووٹوں کے ساتھ پوسٹل ووٹ بھی فیصلہ کن ثابت ہوئے۔ اس ضمنی انتخاب میں دوبارہ گنتی ہونے کی افواہیں تھیں، لیکن ضلع الیکشن آفیسر و کلکٹر ابھیجیت راوت نے واضح کیا کہ کوئی دوبارہ گنتی نہیں ہوئی۔ ای وی ایم کے 27 مراحل اور پوسٹل ووٹوں کی گنتی مکمل طور پر شفاف انداز میں کی گئی اور نتیجہ جاری کیا گیا۔ اس عمل کی نگرانی الیکشن کمیشن کی جانب سے مقرر کردہ دو سینئر الیکشن انسپکٹرز کر رہے تھے۔الیکشن آفیسر نے سرکاری طور پر ہر مرحلے کے ووٹوں کے اعداد و شمار اعلان کرنے سے پہلے ہی امیدواروں کے نمائندوں نے غیر سرکاری اعداد و شمار باہر پیش کر دیے، جس سے الجھن پیدا ہوئی۔ تاہم، انتظامیہ نے شفافیت کے ساتھ پوری کارروائی مکمل کیے جانے کا یقین دلایا۔اسی دوران کلکٹر ابھیجیت راوت نے پچھلے ڈیڑھ مہینے سے جاری لوک سبھا اور اسمبلی انتخابات میں بڑی تعداد میں شہریوں کی شرکت پر ان کا شکریہ ادا کیا ہے۔ ضلع میں لوک سبھا کے ساتھ نو اسمبلی نشستوں پر انتخابات مکمل ہوئے۔ یہ تمام عمل پرامن طریقے سے مکمل ہوا۔ اس کے لیے معاون آفیسرز، پولیس انتظامیہ، ریاستی اور مرکزی حکومت کے ملازمین، میڈیا نمائندگان، اور مختلف اقدامات میں شامل رضاکار تنظیموں اور معززین کا شکریہ ادا کیا گیا۔