ناندیڑ ضلع کے رکنِ پارلیمنٹ رویندر چوہان نے سیلاب سے متاثرہ علاقوں کا دورہ کیا

ناندیڑ:31؍اگست (شیخ عمران): ناندیڑ شہر میں گزشتہ دو دنوں سے جاری موسلادھار بارش کی وجہ سے شہر کے پرانے اور متاثرہ علاقوں جیسے کہ کھڑکپورہ، سمیراباغ، دولھے شاہ رحمان نگر، طہوراباغ وغیرہ میں سیلاب جیسی صورتِ حال پیدا ہو گئی ہے۔ ان علاقوں میں پانی گھروں میں داخل ہونے سے شہریوں کو شدید مشکلات کا سامنا کرنا پڑا۔شہریوں کی سنگین پریشانیوں کو دیکھتے ہوئے ناندیڑ شہر کانگریس کمیٹی کے جنرل سیکریٹری عبدالحبیب نے رکنِ پارلیمنٹ رویندر چوہان ، ضلع صدر راجیش پاؤڈے اور شہر صدر عبدالسّتار سے خصوصی ملاقات کی۔ اس ملاقات کے دوران عبدالحبیب نے کہا کہ ’’پچھلی بار بھی اس علاقے میں سیلاب آیا تھا، لیکن انتظامیہ کی جانب سے کسی قسم کی مدد فراہم نہیں کی گئی تھی۔ اس بار کی موسلادھار بارش سے شہریوں کو بھاری نقصان کا سامنا کرنا پڑ رہا ہے۔‘‘عبدالحبیب کی باتوں کو سن کر رکنِ پارلیمینٹ رویندر چوہان نے فوری طور پر معاملے کا سنجیدہ نوٹس لیا اور ناندیڑ کے سرپرست وزیر اتل ساوے سے ملاقات کر کے صورتِ حال سے آگاہ کیا۔ انہوں نے کہا’’ناندیڑ شہر اور دیہی علاقوں میں اچانک شدید بارش کے باعث شہریوں کے گھروں میں بڑے پیمانے پر پانی داخل ہو گیا ہے۔ کئی لوگوں کو مالی طور پر بھی نقصان ہوا ہے۔ لہٰذا، انتظامیہ کی جانب سے متاثرہ شہریوں کو جلد از جلد مالی امداد فراہم کی جانی چاہیے۔‘‘اس پورے واقعے کے پیشِ نظر امید کی جا رہی ہے کہ اس بار انتظامیہ سنجیدگی سے اقدامات کرے گا اور متاثرہ شہریوں کو فوری ریلیف پہنچایا جائے گا۔