ناندیڑ شہر میں عوامی مقامات پر شراب نوشی کرنے والوں کے خلاف سخت کارروائی

ناندیڑ: 14؍جولائی ( نامہ نگار) ناندیڑ شہر میں عوامی مقامات پر امن و امان میں خلل ڈالنے والے افراد کے خلاف پولیس نے سخت کارروائی کی ہے۔ پولیس سپرنٹنڈنٹ ابیناش کمار کی ہدایت پر قائم کردہ ناندیڑ سٹی اسٹریٹ سیفٹی ڈرائیو کے تحت مختلف علاقوں میں ٹیموں نے کارروائیاں کیں۔
ایڈیشنل پولیس سپرنٹنڈنٹ سورج گرو اور ٹیم انچارج سب انسپکٹر بھاگوت ناگرگوجے کی رہنمائی میں 13 جولائی 2025 ءکو مختلف علاقوں میں عوامی مقامات پر شراب نوشی کرکے ماحول خراب کرنے والوں کے خلاف کارروائی کی گئی۔ درج ذیل کارروائیاں عمل میں آئیں۔
1) ناندیڑ رورل پولیس اسٹیشن (چارلی ٹیم 1 و 2):
ایم آئی ڈی سی علاقہ میں 2 افراد شراب نوشی کرتے ہوئے پائے گئے، جن کے خلاف مہاراشٹرا پولیس ایکٹ کی دفعہ 110/117 کے تحت کارروائی کی گئی۔ اسی کے ساتھ علاقہ میں موجود شراب کی دکانوں، وائن شاپس اور ہوٹلوں کی بھی جانچ کی گئی۔
2) بھاگیہ نگر پولیس اسٹیشن (چارلی ٹیم 1 و 2):
پٹرولنگ کے دوران پورنا روڈ، ایریگیشن کوارٹرز علاقہ میں 3 افراد شراب پی کر عوامی ماحول خراب کرتے ہوئے پائے گئے۔ ان پر بھی دفعہ 110/117 کے تحت کارروائی ہوئی اور قریبی شراب فروش مقامات کی تفتیش کی گئی۔
3) شیواجی نگر پولیس اسٹیشن (چارلی ٹیم 1 و 2):
جیوتی ٹاکیز روڈ پر پٹرولنگ کے دوران ایک شخص شراب نوشی کرتا ہوا پکڑا گیا، جس پر قانونی کارروائی کی گئی۔ علاقے کے ہوٹلوں، وائن شاپس وغیرہ کی بھی چیکنگ کی گئی۔
4) ہوائی اڈہ پولیس اسٹیشن (چارلی ٹیم 1):
فائن وائن مارٹ کے نزدیک 2 افراد کو شراب پیتے ہوئے پایا گیا، ان پر بھی پولیس ایکٹ کی دفعات کے تحت کارروائی کی گئی اور شراب فروش مقامات کا معائنہ بھی کیا گیا۔
پولیس سپرنٹنڈنٹ ابیناش کمار نے عوام سے اپیل کی ہے کہ کوئی بھی فرد عوامی مقام پر شراب نوشی نہ کرے، نہ ہی شراب پینے کے لیے جگہ مہیا کرے۔ ایسے افراد کے خلاف سخت کارروائی کی جائے گی تاکہ شہر میں امن قائم رہے۔