ناندیڑ: آج شام انتخابی مہم کا شور تھم جائے گا

ناندیڑ:18؍نومبر(نامہ نگار) 16- ناندیڑ لوک سبھا ضمنی انتخاب اور ریاستی اسمبلی انتخابات کے آخری 48 گھنٹے کی شروعات پیر کی شام 6 بجے سے ہو رہی ہے۔ اس کے بعد تمام سیاسی جماعتوں کو اپنی انتخابی مہم کو روکنا پڑے گا۔ 20 نومبر 2024 ء کو صبح 7 بجے سے شام 6 بجے تک ووٹنگ ہوگی۔ پورے ضلع میں پولیس فورس کی سخت نگرانی اور انتظامات کیے گئے ہیں، تاکہ آزاد اور شفاف ماحول میں عوام کو ووٹ دینے کی ترغیب دی جا سکے۔ضلع کلکٹر ابھیجیت راوت نے بھارت کے شہری تحفظ قانون 2023 ء کے سیکشن 163 کے تحت لوک سبھا ضمنی انتخاب اور اسمبلی حلقوں کے لئے 48 گھنٹے پہلے یہ دفعہ نافذ کرنے کا اعلان کیا ہے۔ اس دوران عوامی جلسے منعقد نہیں کیے جا سکیں گے، لاؤڈ اسپیکر کا استعمال نہیں ہوگا، غیر قانونی اجتماع ؍جلسہ نہیں ہو سکے گا، پانچ سے زیادہ افراد اکٹھے نہیں ہو سکیں گے اور سوشل میڈیا یا الیکٹرانک میڈیا کے ذریعے انتخابی مہم نہیں چلائی جا سکے گی۔
ناندیڑ لوک سبھا ضمنی انتخاب کے لئے کل ووٹرز:
ناندیڑ لوک سبھا حلقے میں بھوکر (303103)، ناندیڑ شمال (358918)، ناندیڑ جنوب (316821)، نائیگاؤں (310375)، دیگلور (312237)، مکھیڑ (307092) سمیت کل 19 لاکھ 8 ہزار 546 ووٹرز اپنے حق رائے دہی کا استعمال کریں گے۔ ان میں مرد 9 لاکھ 78 ہزار 234، خواتین 9 لاکھ 30 ہزار 158 اور 154 تیسری جنس کے افراد شامل ہیں۔
ناندیڑ اسمبلی حلقے کے ووٹرز:
ناندیڑ اسمبلی حلقے میں کنوٹ (278665)، حدگاؤں (299086)، بھوکر (303103)، ناندیڑ شمال (358918)، ناندیڑ جنوب (316821)، لوہا (301650)، نائیگاؤں(310375)، دیگلور (312237)، مکھیڑ (307092) میں کل 27 لاکھ 87 ہزار 947 ووٹرز ہیں۔ ان میں مرد 14 لاکھ 30 ہزار 365، خواتین 13 لاکھ 57 ہزار 410 اور تیسری جنس کے 172 افراد شامل ہیں۔
3,088 پولنگ مراکز اور 5 حساس مراکز:
ضلع میں کل 3,088 پولنگ اسٹیشن ہیں، جن میں سے 1,992 شہری اور 1,596 دیہی پولنگ مراکز ہیں۔ ضلع میں 100% خواتین پولنگ افسران، 100% معذور پولنگ افسران اور 100% نوجوان پولنگ افسران والے 9 پولنگ مراکز ہیں۔ اس کے علاوہ ضلع میں 5 حساس پولنگ مراکز بھی ہیں۔ ان میں کنوٹ کے پانگرپاڑ، حدگاوں کے چورمبا، بھوکر کے پاکی تانڈا ، دیگلور کے رام تیرتھ اور مکھیڑ کے کولے گاؤں شامل ہیں۔ ان مقامات پر سینٹرل ریزرو فورس کے اہلکار تعینات کیے جائیں گے۔ ضلع میں امن و امان برقرار رکھنے کے لیے پولیس فورس بھی فعال ہو جائے گی۔ ضلع کی انتخابی کارروائی کو پرامن اور خوشگوار بنانے کے لیے 21,000 سے زیادہ اہلکار تعینات کیے گئے ہیں اور انہیں تربیت بھی دی گئی ہے۔ ضلع انتظامیہ نے لوک سبھا ضمنی انتخاب کے پیش نظر پہلے ہی اس تعلق سے جامع منصوبہ بندی کی تھی، جس کے تحت اہلکاروں کی مناسب تعداد فراہم کی گئی ہے۔
پولنگ بوتھ مینجمنٹ پر پابندیاں:
سیاسی جماعتوں کو پولنگ بوتھ پر کیسی مینجمنٹ کرنی ہے، وہاں کس طرح کے بینر لگانے ہیں، نشستوں کا انتظام کیسے کرنا ہے اور بھیڑ کو کیسے قابو کرنا ہے، اس پر قواعد و ضوابط جاری کیے گئے ہیں۔ پولنگ اسٹیشن کے قریب اسلحہ رکھنا یا اس کی نمائش کرنا ممنوع ہوگا۔
سخت سیکیورٹی انتظامات:
ضلع پولیس سپرنٹنڈنٹ کی نگرانی میں ضلع بھر میں سخت حفاظتی انتظامات کیے جا رہے ہیں۔ مرکزی فورسز اور مقامی پولیس فورس کو مختلف مقامات پر تعینات کیا گیا ہے، جبکہ پولنگ مراکز پر بھی سخت سیکیورٹی فراہم کی جائے گی۔
سیاسی رہنماؤں کی موجودگی پر پابندیاں:
مہم کے اختتام کے بعد 48 گھنٹے کے دوران حلقے سے باہر کے سیاسی رہنماؤں اور کارکنوں کو حلقے میں رہنے کی اجازت نہیں ہوگی۔ صرف وہی افراد جو متعلقہ حلقے کے ووٹر ہوں گے، ان کی موجودگی کی اجازت ہوگی۔
موبائل فون کا استعمال ممنوع:
کلکٹر نے واضح کیا ہے کہ صرف متعلقہ انتخابی اہلکاروں کو پولنگ اسٹیشن کے 100 میٹر کے دائرے میں موبائل فون استعمال کرنے کی اجازت ہوگی، دیگر کسی بھی شخص کو موبائل لے کر پولنگ اسٹیشن میں داخل ہونے کی اجازت نہیں ہوگی۔ امیدواروں، ان کے نمائندوں، پولنگ ایجنٹس، ووٹرز اور میڈیا نمائندوں کو اس پر عمل کرنا ہوگا۔
عوامی تعطیل، بازار بند:
20 نومبر کو پولنگ کے دن سرکاری تعطیل ہوگی۔ تمام ضروری اور پرائیویٹ ادارے جیسے دکانیں اور ریسٹورنٹس کھلے رہ سکتے ہیں، لیکن انہیں اپنے ملازمین کو کم از کم دو گھنٹے کی تعطیل دینی ہوگی۔ اس دن ضلع کے تمام ہفتہ بازار بند رہیں گے اور یہ بازار اگلے دن منعقد ہوں گے۔
48 گھنٹے کے لئے شراب کی فروخت پر پابندی:
پولیس کے انتظامات اور قانون و انتظام کی صورتحال کو مدنظر رکھتے ہوئے پیر کی شام 6 بجے سے ووٹنگ کے مکمل ہونے تک 48 گھنٹے کے لئے شراب کی فروخت پر پابندی عائد کر دی گئی ہے۔
ریڈیو، بلک ایس ایم ایس اور سوشل میڈیا پر انتخابی مواد کی ممانعت:
48 گھنٹے کے خاموشی کے دوران آکاشوانی، سوشل میڈیا اور پرائیویٹ چینلز پر انتخابی مواد کی نشریات پر پابندی ہوگی۔ اسی طرح موبائل پر بلک ایس ایم ایس کی خدمات بھی بند کر دی جائیں گی۔
درج ذیل پر ممانعت نہیں ہوگی :
گھرگھر انتخابی مہم چلائی جاسکتی ہے ، لیکن اس میں پانچ سے زیادہ افراد شامل نہیں ہو سکیں گے۔ اسی طرح ایمبولینس، دودھ کی گاڑیاں، پانی کے ٹینکر، برقی محکمہ، پولیس اور انتخابی اہلکاروں کی گاڑیوں، بسوں اور اسکول کی گاڑیوں پر کوئی پابندی نہیں ہوگی۔