میرے جوتے صاف کرکے غریب بچوں کو دیے جائیں، شہید فلسطینی بچی کی وصیت

غزہ ،۲۴؍اکتوبر:اسرائیل کی جانب سے گزشتہ دنوں غزہ کے اسپتال پر بمباری کے نتیجے میں شہید ہونے والی فلسطینی بچی حیا کی دلخراش وصیت سامنے آگئی۔ مقبوضہ فلسطین کے علاقے غزہ پر اسرائیل کی وحشیانہ بمباری جاری ہے اور اب تک بچوں اور عورتوں سمیت 3900فلسطینی شہید ہوچکے۔ گزشتہ دنوں اسرائیل نے غزہ میں ہسپتال کو بھی نشانہ بنایا اور بمباری کی جس کے نتیجے میں 500سے زائد فلسطینی شہید ہوگئے۔اس حملے میں کئی بچے بھی شہید ہوئے جن میں ایک بچی حیا بھی شامل تھی۔ حیا کی دلخراش وصیت سوشل میڈیا پر وائرل ہوگئی۔شہید فلسطینی بچی نے سادہ کاغذ پر لکھاکہ میری پاکٹ منی سے45شیکل میری ماں کو دیے جائیں، 5 شیکل میرے بھائی ہاشم اور5بہن ذینہ کو دیے جائیں، 5شیکل دادی اور 5پھپھی کو دیے جائیں۔شہید حیا نے وصیت کی کہ 5شیکل خالہ اور5خالو کو دیے جائیں۔ شہید حیا نے مزید لکھاکہ میرے کھلونے میری بہن اورسہیلیوں کو دئیے جائیں، میرے کپڑے پھپھی زاد بہنوں کو دیے جائیں۔ شہید فلسطینی بچی نے وصیت میں کہا کہ میرے جوتے غریب بچوں کو ملیں، جوتوں کو صاف ضرور کیا جائے۔