مہاراشٹر کے انتخابات میں پیسے کی بارش ہوئی، انتخابی نتائج توقعات کے مطابق نہیں آئے: حسین دلوائی

ممبئی: 23 نومبر:مہاراشٹر میں مہا وکاس اگھاڑی کی شکست کو لے کر کانگریس لیڈر اور راجیہ سبھا کے سابق ایم پی حسین دلوائی کا ردعمل سامنے آیا ہے، انہوں نے کہا کہ جو اعداد و شمار سامنے آئے ہیں، ہمیں ایسی امید نہیں تھی۔ ہم فرض کر رہے تھے کہ ہم قریبی مارجن سے حکومت بنائیں گے۔ مہاراشٹرا میں مہا وکاس اگھاڑی کو معمولی فرق سے حکومت بنانے کی امید تھی، لیکن ہم انتخابات جیتنے میں ناکام رہے ہیں۔ اگر ہم ہارے ہیں تو مان لیں گے لیکن ہمیں شکست کی وجہ کا تجزیہ کرنا ہوگا۔ ان کا مزید کہنا تھا کہ میں سیاست میں کئی سالوں سے ہوں لیکن اس الیکشن میں جتنی رقم کی بارش ہوئی ہے کبھی نہیں ہوئی۔ جس طریقے سے ریاستی خزانے کو خالی کیا گیا وہ انتہائی غلط ہے۔ ریاست میں جس طرح سے ایم ایل اے کو پیسہ دیا گیا اور بدعنوانی کی گئی وہ انتہائی شرمناک ہے۔ میں جاننا چاہتا ہوں کہ اتنا پیسہ کہاں سے آیا؟ دریں اثنا، مہاراشٹر کے انتخابات کے نتائج پر ردعمل ظاہر کرتے ہوئے، مہاراشٹر کے نائب وزیر اعلی دیویندر فڑنویس نے کہا کہ ریاست کے عوام نے ہمیں بے مثال جیت دلائی ہے۔ ملک اور ریاست کے عوام وزیر اعظم نریندر مودی کے ساتھ ہیں۔ ان کے نعرے ‘ہم ایک ہیں تو سیف ہیں’ کے مطابق تمام طبقات اور برادریوں کے لوگوں نے متحد ہو کر ہمیں ووٹ دیا۔ یہ مہایوتی، سی ایم ایکناتھ شندے، ڈپٹی سی ایم اجیت پوار اور رام داس اٹھاولے کی جیت ہے، یہ اتحاد کی جیت ہے۔ عوام نے مذہب کی بنیاد پر ووٹروں کو پولرائز کرنے کی اپوزیشن کی کوششوں کو ناکام بنا دیا۔