مہاراشٹر کی امراوتی سینٹرل جیل کے اندر بڑا دھماکہ، خوف وہراس پھیل گیا

امراوتی: 7 جون:مہاراشٹرا کی امراوتی سنٹرل جیل کے اندر دیسی ساختہ بم یا پٹاخے پھینکنے سے زبردست دھماکہ ہوا ہے۔ تاہم اس واقعے میں فی الحال کوئی جانی نقصان نہیں ہوا ہے۔ موصولہ اطلاعات کے مطابق یہ دھماکہ بیرک 6 اور 7 کے سامنے ہوا۔ واقعہ ہفتہ کی رات تقریباً 8.30 بجے کا بتایا جا رہا ہے۔ واقعہ کی اطلاع ملتے ہی پولیس کمشنر نوین چندر ریڈی، ڈی سی پی اور کئی اعلیٰ پولیس افسران موقع پر پہنچ گئے۔ بم ڈسپوزل اسکواڈ اور فرانزک ٹیم فوری طور پر موقع پر پہنچ گئی اور پولیس فی الحال معاملے کی تحقیقات کر رہی ہے۔ فرانزک ٹیم استعمال شدہ دھماکہ خیز مواد کی شناخت میں مصروف ہے۔ حکام فی الحال جیل کے اندر دھماکہ خیز ڈیوائس پھینکنے کے پیچھے محرکات کی تحقیقات کر رہے ہیں۔ مزید معلومات مکمل تفتیش کے بعد معلوم ہوں گی۔ دھماکہ میں کس قسم کا بارود تھا؟ اس کی معلومات فرانزک تحقیقات کے بعد سامنے آئیں گی۔ ابتدائی تفتیش میں یہ بات سامنے آئی ہے کہ کسی نے پلاسٹک کرکٹ کی گیند کو پٹاخے یا دھماکہ خیز مواد سے بھر کر جیل کی پچھلی دیوار سے پھینک دیا۔ ایک گیند پھٹ گئی جبکہ دوسری برآمد ہوئی۔ پولیس سی سی ٹی وی کے ذریعے دھماکہ خیز گیند پھینکنے والے شخص کی تلاش میں مصروف ہے۔ پولیس کمشنر نوین چندرا ریڈی کا کہنا ہے کہ مہاراشٹر کی امراوتی سینٹرل جیل کے اندر ایک بڑا دھماکہ اس وقت ہوا جب ایک کروڈ بم یا پٹاخہ پھینکا گیا۔ فی الحال کوئی جانی نقصان نہیں ہوا۔ بم ڈسپوزل سکواڈ اور فرانزک ٹیم کے ساتھ اعلیٰ حکام بھی تحقیقات کے لیے موقع پر پہنچ گئے ہیں۔