مہاراشٹر میں گائے کو ‘راجیہ ماتا’ کا درجہ، اسمبلی انتخابات سے قبل ایکناتھ شندے حکومت کا فیصلہ

ممبئی: 30 ستمبر:مہاراشٹر میں ہونے والے اسمبلی انتخابات سے پہلے ایکناتھ شندے کی قیادت والی حکومت نے بڑا فیصلہ لیا ہے۔ مہاراشٹر حکومت نے گائے کو ریاست کی ماں کا درجہ دیا ہے۔ ریاستی حکومت نے پیر کو اس سلسلے میں ایک حکم نامہ جاری کیا، پیر کو کابینہ کی میٹنگ میں ایکناتھ شندے حکومت نے گائے کو ‘راجیہ ماتا’ کا درجہ دینے کا فیصلہ کیا۔ حکومت کی طرف سے جاری کردہ حکم نامے کے مطابق "قدیم زمانہ سے گائے نے انسانوں کی روزمرہ زندگی میں اہم کردار ادا کیا ہے۔ ویدک دور سے ہی گائے کی مذہبی، سائنسی اور معاشی اہمیت کو دیکھتے ہوئے انہیں "کامدھینو” کے نام سے مخاطب کیا جاتا تھا۔ ریاست کے کچھ حصوں میں دیسی گائے پائی جاتی ہیں، تاہم، دیسی گایوں کی تعداد میں روز بروز کمی واقع ہو رہی ہے۔” اس میں کہا گیا ہے، "حکومت نے یہ فیصلہ کسانوں کو دیسی گایوں کو پالنے کی ترغیب دینے کے لیے لیا ہے۔ ویدک دور سے ہندوستانی ثقافت میں دیسی گایوں کا اہم مقام، آیورویدک ادویات میں ان کی افادیت، انسانی خوراک میں گائے کے دودھ اور گھی کی اہمیت۔ نامیاتی کھیتی میں گائے کے گوبر اور گائے کے پیشاب کی اہمیت، پنچ گاویہ علاج کے نظام اور افادیت کو ذہن میں رکھتے ہوئے، اب سے دیسی گایوں کو ‘راجیہ ماتا’ کہا جائے گا۔” حکومت نے کہا کہ اس آرڈر کی ڈیجیٹل کاپی مہاراشٹر حکومت کی سرکاری ویب سائٹ پر دستیاب ہے۔آپ کو بتاتے چلیں کہ مہاراشٹر میں اس سال کے آخر میں اسمبلی انتخابات ہونے ہیں۔ مہاراشٹر میں اسمبلی کی 288 سیٹیں ہیں۔ آخری اسمبلی انتخابات اکتوبر 2019 میں ہوئے تھے۔ اس دوران بی جے پی اور شیو سینا نے مل کر الیکشن لڑا تھا اور انہیں قطعی اکثریت ملی تھی لیکن حکومت سازی کو لے کر دونوں پارٹیوں کے درمیان اختلاف ہوا اور وہ الگ ہو گئے۔