مہاراشٹر میں اورنگ زیبؒ کے مقبرے کی سیکیورٹی بڑھا دی گئی، لوہے کی چادریں لگائی گئیں

اورنگ آباد: 20 مارچ:مہاراشٹر کے اورنگ آباد کے خلد آباد میں واقع اورنگ زیبؒ کے مقبرے کے ارد گرد سیکورٹی سخت کر دی گئی ہے۔ قبر کو ہٹانے کے تنازعہ اور بیان بازی کے باعث پولیس نے علاقے میں اپنی نفری بڑھا دی ہے۔ قبر کے ارد گرد سیکیورٹی کو مزید سخت کرنے کے لیے بدھ کے روز قبر کے پیچھے دیوار پر لوہے کی بڑی پلیٹیں لگائی گئی تھیں تاکہ کسی کو بغیر اجازت اس جگہ میں داخل ہونے سے روکا جا سکے۔ اس سے قبل نظام حکومت کے دوران اورنگ زیب کی قبر کی حفاظت کے لیے حضرت خواجہ سید زین الدین شیرازی نے سنگ مرمر کی جالی لگوائی تھی۔ اس کے بعد قبر پر سبز جالی پلاسٹک کا جال بھی نصب کیا گیا تاکہ حفاظتی انتظامات کو بڑھایا جا سکے۔ اب حفاظتی اقدام کے طور پر اورنگ زیب کے مقبرے کے گرد لوہے کی چادروں کی باؤنڈری لگائی گئی ہے جس سے اس جگہ کی سیکیورٹی مزید مضبوط ہو گئی ہے۔ یہ اقدام ریاست میں جاری تنازعہ کے درمیان سامنے آیا ہے جس میں ایک طبقہ اورنگ زیب کے مقبرے کو ہٹانے کا مطالبہ کر رہا ہے جبکہ دوسرا طبقہ اسے تاریخی ورثہ کے طور پر دیکھتا ہے۔ جس کی وجہ سے علاقے میں پولیس اور انتظامیہ کی نفری بڑھا دی گئی ہے اور کسی بھی ناخوشگوار واقعے سے بچنے کے لیے سیکیورٹی کے سخت انتظامات کیے گئے ہیں۔ اس سے قبل ہفتے کے روز اورنگزیب کے مقبرے کے ارد گرد سیکیورٹی سخت کردی گئی تھی۔ قبر کو گرانے کی دھمکیوں کے پیش نظر ضلعی پولیس حکام نے ہفتے کے روز قبر کا دورہ کیا اور صورتحال کا جائزہ لیا۔ اس دوران ایس آر پی کی ایک کھیپ کو تعینات کیا گیا تھا، جبکہ مقامی پولیس سیکورٹی پہلے سے موجود ہے۔قبر کی حفاظت کے لیے انسپکٹر سطح کے دو سینئر افسران 24 گھنٹے ڈیوٹی پر تعینات کیے گئے ہیں۔ اس کے علاوہ قبر کی طرف جانے والی سڑک پر دو مقامات پر ناکہ بندی کر دی گئی ہے اور دو فکس پوائنٹس بھی بنائے گئے ہیں۔ قبر پر آنے والے ہر شخص کو چیک کیا جا رہا ہے اور پھر جانے کی اجازت دی جا رہی ہے۔