موئید المسلمین ہائی اسکول میں تنظیمی وابستگی اور نوجوان قیادت کی حوصلہ افزائی

پربھنی :26؍جون ( ضلع نامہ نگار اعتبار نیوز محمد سرور شریف )موئید المسلمین ہائی اسکول، جو کہ میمن مرچنٹس اسوسی ایشن پربھنی کے زیر انتظام کامیابی سے چلایا جا رہا ہے، میں ایک پُراثر تقریب کا اہتمام کیا گیا، جس میں میمن مرچنٹس اسوسی ایشن کے نو منتخب اعزازی اراکین کا پُرجوش استقبال عمل میں آیا۔اس موقع پر اسکول کے صدر مدرس جناب سید اقبال صاحب کی جانب سے خمیسہ محمد جنید، سکندر عبدالرزاق کوٹھاری، محمد انور عبدالرزاق اور محمد فرحان ہنگورا کا پرتپاک خیر مقدم کیا گیا۔ مدرسہ ہٰذا کے صدر مدرس نے ان نوجوانوں کی خدمات کو سراہتے ہوئے کہا کہ تنظیم کے مستقبل کے لیے ایسی نوجوان قیادت امید کی کرن ہے، جو قوم و ملت کی ترقی کے لیے پُرعزم ہے۔ نوجوان قیادت کا تعلیمی اداروں سے تعلق مضبوط ہو تاکہ طلبہ میں نہ صرف تعلیمی بلکہ اخلاقی اور سماجی شعور بھی اجاگر ہو۔ یہ تقریب تنظیمی ہم آہنگی اور ادارہ جاتی ترقی کا ایک روشن نمونہ ثابت ہوئی۔