معصوم روزے دار زنیرہ حسن الکثیری کا پہلا روزہ

ناندیڑ22 مارچ (حیدر علی): سابق کارپوریٹر حسن الکثیری کی دختر اور سابق کارپوریٹر سید مظہر حسین کی نواسی زنیرہ حسن الکثیری نے محض 8 سال کی عمر میں اپنے زندگی کا پہلا روزہ رکھ کر ایمانی جذبے کا مظاہرہ کیا۔اس خاص موقع پر آر کے بینکوٹ ہال میں ایک پُروقار دعوتِ افطار اور روزہ رکھائی تقریب منعقد کی گئی جس میں رشتہ داروں اور دوست احباب نے شرکت کی۔ تقریب میں زنیرہ حسن الکثیری کی حوصلہ افزائی کرتے ہوئے ان کی گلپوشی کی گئی اور انہیں دعاؤں سے نوازا گیا۔معصوم زنیرہ کے اس ایمانی جذبے کو دیکھتے ہوئے حاضرین نے خوشی اور مسرت کا اظہار کیا۔ کم عمری میں روزہ رکھنے کا عزم اور دین سے محبت کا یہ مظاہرہ سب کے لیے قابلِ ستائش رہا۔اس موقع پر اہل خانہ نے بھی زنیرہ الکثیری کی ہمت اور حوصلے کو سراہا اور کہا کہ معصوم بچی نے اپنی کم عمری کے باوجود عبادت کا جو شوق ظاہر کیا ہے وہ دوسروں کے لیے بھی ایک مثال ہے۔