مرکزی کابینہ نے ‘ون نیشن، ون الیکشن’ سے متعلق بل کو منظوری دی، سرمائی اجلاس میں پیش کیا جا سکتا ہے

نئی دہلی: 12 دسمبر:مرکزی کابینہ نے جمعرات کو ‘ایک قوم، ایک انتخاب’ سے متعلق بل کو منظوری دے دی۔ پارلیمنٹ کا سرمائی اجلاس جاری ہے، اس اجلاس میں یہ بل پارلیمنٹ میں پیش کیا جا سکتا ہے، میڈیا رپورٹس کے مطابق مرکزی کابینہ نے ‘ایک ملک، ایک انتخاب’ پر رام ناتھ کووند کمیٹی کی رپورٹ کو پہلے ہی منظوری دے دی ہے۔ یہ بل پورے ملک میں ایک الیکشن کی راہ ہموار کرتا ہے۔ ذرائع کے مطابق مرکزی حکومت اب اس بل پر اتفاق رائے پیدا کرنا چاہتی ہے۔ حکومت اسے تفصیلی بحث کے لیے مشترکہ پارلیمانی کمیٹی یا جے پی سی کو بھیج سکتی ہے۔ وزیر اعظم نریندر مودی کی زیر صدارت مرکزی کابینہ نے اس سال ستمبر میں لوک سبھا، ریاستی اسمبلیوں اور بلدیاتی اداروں کے لیے مرحلہ وار انتخابات کے انعقاد کے لیے ‘ایک ملک، ایک انتخاب’ کے نفاذ کو منظوری دی تھی۔ ذرائع کے مطابق جے پی سی تمام سیاسی جماعتوں کے نمائندوں سے بات چیت کرے گی۔ دیگر اسٹیک ہولڈرز کو بھی اس عمل میں شامل کیا جائے گا۔ جانکاری کے مطابق اس بحث میں تمام ریاستوں کے اسمبلی اسپیکر کے ساتھ آئینی ماہرین کے بھی شامل ہونے کی امید ہے۔ اس بل پر عام لوگوں کی رائے لینے کا بھی منصوبہ ہے۔ بحث کے دوران بل کے اہم پہلوؤں، اس کے فوائد اور ملک بھر میں بیک وقت انتخابات کے لیے درکار طریقہ کار اور انتخابی انتظامات پر تبادلہ خیال کیا جائے گا۔ مرکزی وزرائے دفاع راج ناتھ سنگھ، ارجن رام میگھوال اور کرن رجیجو کو اس معاملے پر اپوزیشن جماعتوں کے ساتھ بات چیت کی ذمہ داری کے لیے مقرر کیا گیا ہے۔میڈیا رپورٹس کے مطابق ‘ون نیشن، ون الیکشن’ پر عمل درآمد کے لیے کم از کم چھ بل لانا ہوں گے۔ مرکزی حکومت کو پارلیمنٹ میں دو تہائی اکثریت کی ضرورت ہوگی۔ این ڈی اے کو پارلیمنٹ کے دونوں ایوانوں لوک سبھا اور راجیہ سبھا میں اکثریت حاصل ہے۔ لیکن، مرکزی حکومت کے لیے ایوان میں دو تہائی اکثریت حاصل کرنا مشکل ہو سکتا ہے۔