لکھنؤ آگرہ ایکسپریس وے پر بس کھائی میں گر گئی، 42 زخمی

قنوج (اتر پردیش):23 جون۔لکھنؤ آگرہ ایکسپریس وے پر اتوار کی صبح ایک بس الٹ کر کھائی میں گر گئی۔ حادثے میں 42 افراد زخمی ہوئے، موصولہ اطلاعات کے مطابق یہ ایک پرائیویٹ ڈبل ڈیکر بس تھی، جو جونپور سے دہلی جا رہی تھی۔ حادثہ صبح سویرے ڈرائیور کے سو جانے کی وجہ سے پیش آیا۔ زخمیوں میں سے 30 کو سوریکھ کے سرکاری اسپتال اور 12 کو تروا میڈیکل کالج میں علاج کے لیے بھیجا گیا ہے۔ اے ایس پی، سی او سمیت متعدد تھانوں کی پولیس ٹیمیں موقع پر پہنچ گئیں اور زخمی مسافروں کو باہر نکالا۔ پولیس ترجمان نے بتایا کہ یہ حادثہ چھبراماؤ تحصیل کے سوریکھ تھانہ علاقے میں پیش آیا۔ زخمی مسافروں کی حالت کے بارے میں تفصیلی معلومات کا انتظار ہے۔