فیض کیمپس میں آسمان اردو ادب کے روشن ستاروں کی آمد

پربھنی:12؍فروری ( ضلع نامہ نگار اعتبار نیوز محمد سرور شریف) فیض العلوم ایجوکیشن سوسائٹی کے زیرِ اہتمام فیض کیمپس میں اردو زبان و ادب کے فروغ کی ایک درخشاں مثال اس وقت دیکھنے کو ملی جب ہندوستان کے ممتاز اور صاحبِ اسلوب شعراء کرام کے اعزاز میں ایک شاندار استقبالیہ پروگرام منعقد کیا گیا۔ یہ محفلِ ادب نہ صرف شعری ذوق کی تسکین کا ذریعہ بنی بلکہ اردو کی تہذیبی عظمت اور فکری وراثت کی بھرپور ترجمان بھی ثابت ہوئی۔اس بامعنی ادبی نشست میں محترمہ انا دہلوی صاحبہ، جناب اسلم چشتی (پونہ)، مہکش اعظمی (اعظم گڑھ) اور ڈاکٹر منیب حنفی جیسے کہنہ مشق اور معتبر نام شریک رہے۔ تمام معزز مہمانوں کا والہانہ استقبال فیض العلوم ایجوکیشن سوسائٹی کے معتمد ڈاکٹر محمد سمیع اللہ خان صاحب نے کیا، جن کے خلوص اور ادب نوازی نے محفل کو وقار بخشا۔اس موقع پر اسٹیج پر سابقہ صدر مدرس معین الدین صدیقی صاحب، محترم ثناء اللہ خان (پرنسپل، فاطمہ ہائی اسکول و جونیئر کالج) اور فیض العلوم پرائمری اسکول کے صدر مدرس محمد صفی اللہ خان صاحب جلوہ افروز تھے، جن کی موجودگی نے تقریب کو علمی و انتظامی استحکام عطا کیا۔ نظامت کے فرائض مفتی سعید سر نے نہایت سلیقہ مندی اور خوش بیانی کے ساتھ انجام دیے، جس سے پروگرام کی روانی اور وقار میں اضافہ ہوا۔محفل کا اصل حسن شعراء کرام کا کلام تھا، جس میں محبت، انسانیت، سماجی شعور اور تہذیبی اقدار کی خوشبو رچی بسی تھی۔ ہر شاعر نے اپنے منفرد اسلوب میں اردو کی لطافت اور معنویت کو پیش کیا، جس پر حاضرین بار بار داد و تحسین پیش کرتے رہے۔ طلباء و طالبات کے چہروں پر ادب سے قربت اور زبان سے انس کی جھلک نمایاں تھی۔اس موقع پر اپنے صدارتی خطاب میں ڈاکٹر محمد سمیع اللہ خان صاحب نے فیض العلوم ایجوکیشن سوسائٹی کے قیام، اس کے تعلیمی و ادبی مشن اور اردو زبان سے ادارے کی غیر متزلزل وابستگی پر مفصل روشنی ڈالی۔ انہوں نے اردو کی بقا اور فروغ کے لیے مسلسل جدوجہد کو وقت کی اہم ضرورت قرار دیا اور طلباء و طالبات کی محنت، شوقِ علم اور کامیابیوں کو مہمانانِ ادب کے سامنے فخر کے ساتھ پیش کیا۔تقریب کے دوران مختلف تعلیمی و ادبی مقابلوں میں نمایاں کارکردگی دکھانے والے طلباء و طالبات کو انعامات سے نوازا گیا۔ جماعت پنجم کی طالبہ عشمیرہ فاطمہ دخترِ شیخ واجد کو اعتماد، حاضر جوابی اور بہترین اظہارِ خیال پر “بیسٹ اسٹوڈنٹ ” کے اعزاز سے سرفراز کیا گیا، جسے حاضرین نے بھرپور داد کے ساتھ سراہا۔اس یادگار ادبی تقریب میں کثیر تعداد میں طلباء و طالبات، اساتذہ کرام اور ادب دوست افراد نے شرکت کی اور اردو سے اپنی محبت کا عملی ثبوت پیش کیا۔ آخر میں محفل خوشگوار یادوں کے ساتھ اختتام پذیر ہوئی۔ اس طرح کی اطلاع محمد ابرار علی خان سر نے دی۔