عبدالمجید سالار اقراء اردو ہائی اسکول بورنار میں مینا بازار (فوڈ فیسٹیول) کا شاندار انعقاد

بورنار :21؍دسمبر(راست):اقراء ایجوکیشن سوسائٹی کے زیرِ اہتمام چلنے والے معروف تعلیمی ادارے عبدالمجید سالار اقراء اردو ہائی اسکول بورنار میں طلبہ کی ہمہ جہت صلاحیتوں کو نکھارنے کے مقصد سے مینا بازار (فوڈ فیسٹیول) کا شاندار اور کامیاب انعقاد عمل میں آیا۔ اس تعلیمی و تفریحی پروگرام میں جماعت پنجم تا دہم کے طلبہ نے غیر معمولی دلچسپی، جوش و خروش اور تخلیقی انداز کے ساتھ شرکت کی۔فوڈ فیسٹیول کے موقع پر طلبہ نے مختلف اقسام کی مزیدار اور روایتی اشیائے خورد و نوش کی دلکش اسٹالز لگائیں، جن میں گھریلو پکوان، اسنیکس اور ذائقہ دار کھانے شامل تھے۔ طلبہ نے نہ صرف خود اسٹالز کی تزئین و آرائش کی بلکہ خرید و فروخت، حساب کتاب اور گاہکوں سے خوش اخلاقی کے ساتھ پیش آنے کا عملی مظاہرہ بھی کیا، جسے حاضرین نے بے حد سراہا۔مینا بازار کے دوران طلبہ کے سرپرستوں، اساتذۂ کرام اور معزز مہمانوں نے مختلف اسٹالز کا دورہ کیا، طلبہ کی محنت، سلیقہ مندی اور کاروباری سوچ کی تعریف کی اور بازار سے لطف اندوز ہوتے ہوئے ان کی حوصلہ افزائی کی۔ اس موقع پر تعلیمی ماحول کے ساتھ ساتھ خوشگوار اور پرمسرت فضا قائم رہی۔یہ پروگرام طلبہ میں کاروباری شعور، خود اعتمادی، باہمی تعاون، نظم و ضبط اور ذمہ داری کے احساس کو فروغ دینے کا ایک مؤثر ذریعہ ثابت ہوا۔ اس طرح کی سرگرمیاں بچوں کی عملی تربیت میں اہم کردار ادا کرتی ہیں اور انہیں مستقبل کے چیلنجز کے لیے تیار کرتی ہیں۔یہ کامیاب پروگرام اسکول کے انچارج ہیڈ ماسٹر عارف محمد خان کی زیرِ سرپرستی منعقد ہوا، جن کی بہترین رہنمائی، منصوبہ بندی اور نگرانی میں یہ تقریب نہایت خوش اسلوبی کے ساتھ انجام پائی۔ اس موقع پر اقراء ایجوکیشن سوسائٹی کے صدر ڈاکٹر عبدالکریم سالار صاحب اور سوسائٹی کے دیگر ذمہ داران و اراکین نے اسکول انتظامیہ، اساتذہ اور طلبہ کو اس کامیاب انعقاد پر دلی مبارکباد پیش کی۔آخر میں منتظمین کی جانب سے تمام مہمانوں، سرپرستوں، اساتذۂ کرام اور طلبہ کا تہہ دل سے شکریہ ادا کیا گیا جن کے تعاون سے یہ مینا بازار ایک یادگار اور کامیاب پروگرام ثابت ہوا۔