ضلع کلکٹر ناندیڑ راہول کرڈیلےنے وشنوپوری پروجیکٹ کا دورہ کر کے معائنہ کیا

ناندیڑ:17 اگست: (شیخ عمران ) ضلع میں گزشتہ دو دنوں سے مسلسل بارش جاری ہے، جس کے نتیجے میں کئی تعلقہ جات میں سیلاب جیسی صورتحال پیدا ہو گئی ہے۔ اسی تناظر میں آج صبح ضلع کلکٹر راہول کرڈیلے نے ناندیڑ میں واقع ڈاکٹر شنکر راو چوہان وشنوپوری پروجیکٹ کا دورہ کیا اور اس کا معائنہ کیا۔پروجیکٹ کے کُل 18 دروازوں میں سے اس وقت 4 دروازے کھول دیے گئے ہیں، جن سے تقریباً 48 ہزار 478 کیوسک پانی کا اخراج کیا جا رہا ہے۔ پانی کی آمد کے لحاظ سے اخراج کو کم یا زیادہ کیا جائے گا۔ اس وقت پروجیکٹ میں پانی کی سطح 353.25 میٹر ہے۔ اس موقع پر کلکٹر راہول کردیلے نے ایس سی اے ڈی اے (SCADA) روم میں داخل ہو کر گوداوری ندی پر واقع تمام بندوں کی پانی کی سطح اور اپلِفٹ ایریگیشن اسکیم کے متعلق تفصیلی معلومات حاصل کیں۔سیلابی صورتحال کے پیش نظر ضلع کی تمام مشینریاں متحرک ہیں، اور ضروری احتیاطی تدابیر اور اقدامات انتظامیہ کی طرف سے کیے جا رہے ہیں۔ شہریوں سے اپیل کی گئی ہے کہ وہ افواہوں پر دھیان نہ دیں اور انتظامیہ سے تعاون کریں۔ نیز، گوداوری ندی کے کنارے واقع دیہات کے رہائشیوں کو خاص احتیاط برتنے، چوکس رہنے اور کسی جانی نقصان سے بچنے کے لیے ضروری اقدامات کرنے کی تلقین کی گئی ہے۔انہوں نے یہ بھی کہا کہ لوگ اپنے مویشیوں کو کھلا نہ چھوڑیں تاکہ وہ سیلابی پانی میں بہہ نہ جائیں۔اس موقع پر وشنوپوری منصوبے کے ایگزیکٹیو انجینئر ساونت، ڈاکٹر و سب ڈویژنل آفیسر سچن کھلل، تحصیلدار سنجے وارکڈ، اسسٹنٹ انجینئر اور دیگر ریونیو افسران و عملہ موجود تھے۔