شیخ کریم کی کوشش سے نایاب نسل کا سانپ محفوظ

ناندیڑ:23؍اگست ( نمائندہ اعتبار) ناندیڑ کے تلشی رام نگر کے ساکن شیخ کریم عبدالوہاب کو رات تقریباً 10:41 بجے بودھِسَتوا نگر کے ساکن سنجے بھگوان راو ہنکارے کا فون آیا کہ ان کے گھر میں سانپ نکلا ہے۔ اطلاع ملتے ہی شیخ کریم فوراً وہاں پہنچے اور گھر کی جانچ کرنے پر ایک نہایت نایاب نسل کاریڈ سینڈ بوا (مانڈول)سانپ برآمد ہوا۔یہ سانپ انتہائی نایاب نسل کا شمار ہوتا ہے اور غیر قانونی اسمگلنگ میں استعمال کیا جاتا ہے۔ بین الاقوامی بلیک مارکیٹ میں اس سانپ کی قیمت تقریباً 10 لاکھ سے 1 کروڑ روپئے تک بتائی جاتی ہے۔شیخ کریم نے فوراً اس نایاب سانپ کو محفوظ طریقے سے اپنے قبضے میں لے کر پولیس سپرنٹنڈنٹ دفتر ناندیڑ پہنچ کر ایس پی ابیناش کمار کو اس بارے میں آگاہ کیا۔ ایس پی نے فوری طور پر ہدایت دی کہ سانپ کو محکمہ جنگلات کے حوالے کیا جائے تاکہ اس کا تحفظ کیا جا سکے۔ایس پی ابیناش کمار نے شیخ کریم کی اس قابلِ ستائش خدمت پر ان کی تعریف کی اور عوام سے اپیل کی کہ کسی بھی جنگلی جانور یا نایاب مخلوق کی غیر قانونی خرید و فروخت یا اسمگلنگ نہ کریں، کیونکہ اس پر سخت قانونی کارروائی کی جائے گی۔