شیخ ریحانہ امین (ہری نگر میونسپل اردو اسکول ) کو میئر ایوارڈ

ممبئی:20؍مارچ(راست) ممبئی مضافات کے ہری نگر میونسپل اردو اسکول کی فعال معلمہ شیخ ریحانہ امین کو تعلیمی میدان میں ان کی فعال کارکردگی کی بنیاد پر ایڈیشنل میونسپل کمشنر ڈاکٹر امیت سینی کے ہاتھوں میئر ایوارڈ سے نوازا گیا۔ یہ ایوارڈ ۱۱۰۰۰ ؍روپئے، اعزازی میڈل، توصیفی نشان، سند، شال، ناریل اور فیتہ پر مشتمل ہے۔ اس موقع پر ہری نگر میونسپل اردو اسکول کے تمام اساتذہ، طلبہ اور والدین کی جانب سے ریحانہ امین کو مبارکباد اور مستقبل کے لیے نیک خواہشات پیش کی گئی۔واضح رہے کہ ممبئی میونسپل کارپوریشن کے محکمۂ تعلیم کی جانب سے ہر سال سابق صدر جمہوریہ سروپلی رادھا کرشنن کی یوم پیدائش(۵ ستمبر) کے موقع پر اساتذہ کو بہترین کارکردگی کی بنیاد پر ان کی حوصلہ افزائی کی غرض سے میئر ایوارڈ سے نوازا جاتا ہے۔ امسال اس ایوارڈ کے لیے منتخب اساتذہ کے ناموں کا اعلان 5 ستمبر کو ایک پریس کانفرنس میں کیا گیا تھا۔ اس سلسلے میں اعزازی تقریب کا انعقاد 18 مارچ کو بائیکلہ میں واقع انا بھاؤ ساٹھے ناٹیہ گرہ میں کیا گیا۔ جہاں 50اساتذہ کو ان کی کارکردگی کی بنیاد پر مذکورہ ایوارڈ سے نوازا گیا۔