سیکھنے کا نیا تجربہ :فیض العلوم پرائمری اسکول کے طلبہ بیکری کے دورے پر

پربھنی :5؍جنوری(ضلع نامہ نگار اعتبار نیوز محمد سرور شریف )فیض العلوم پرائمری اسکول کی جماعت پنجم کے طلبہ کو پیشہ ورانہ تعلیم سے واقف کروانے کے مقصد سے ایک معلوماتی تعلیمی دورے کا اہتمام کیا گیا۔ اس موقع پر طلبہ کو قریبی بیکری میں لے جایا گیا، جہاں انہیں بیکری کے کام، روٹی، کیک اور دیگر اشیائے خوردونوش کی تیاری کے مختلف مراحل کے بارے میں عملی معلومات فراہم کی گئیں۔اس تعلیمی دورے کی نگرانی معلم جماعت محمد ابرار خان نے کی۔ بیکری کے مالک شیخ نوید نے طلبہ کو خوش دلی سے خوش آمدید کہا اور بیکری کے آلات، صفائی، معیار اور پیشہ ورانہ ذمہ داریوں پر تفصیلی روشنی ڈالی۔ طلبہ نے اس دورے میں گہری دلچسپی ظاہر کی اور سوالات بھی کیے۔اس قسم کے تعلیمی دورے طلبہ میں عملی علم، خود اعتمادی اور پیشہ ورانہ شعور بیدار کرنے میں اہم کردار ادا کرتے ہیں۔