سیلاب متاثرین کو مدد نہ ملنے اور سروے نہ ہونے پرکانگریس کی جانب سے بھوک ہڑتال کا اشارہ

ناندیڑ: 31اکتوبر(نامہ نگار) ناندیڑ شہر میں پچھلے دنوں شدید بارش سے کئی علاقوں میں سیلاب کی صورتحال پیدا ہوچکی تھی۔ مکانات میں بارش کا پانی داخل ہوجانے سے لوگوں کے گھریلو اشیاء اور دیگر سامان کو نقصان پہنچا تھا۔ ضلعی انتظامیہ نے سیلاب متاثرین میں سرکاری مدد کے لیے سروے شروع کیا تھا۔ سروے کا کام مکمل ہونے کی بات بتائی جارہی ہے مگر ابھی تک کئی سیلاب متاثرین کا سروے نہیں کیا گیا۔ اس سلسلے میں آج کانگریس پارٹی کے ایک وفد نے کلکٹر آفس پہنچ کر آر ڈی سی اجئے امبیکر کو ایک میمورنڈم پیش کیا۔ جس میں بتایا گیا کہ پچھلے دنوں شدید بارش سے جو لوگ متاثر ہوئے تھے اور جن کا سروے مکمل ہوچکا ہے اُنہیں فوری سرکاری امداد فراہم کی جائے اور اسی طرح اب تک جن لوگوں کا سروے نہیں ہوا ہے ایسے حقیقی متاثرین کا بھی سروے کیا جائے تاکہ وہ بھی سرکاری امداد سے محروم نہ رہ سکیں۔ اس میمورنڈم میں بتایا گیا کہ اگر سیلاب متاثرین میں جلد سے جلد معاوضہ کی رقم فراہم نہیں کی جاتی ہے اور سروے کا کام مکمل نہیں کیا جاتا ہے تو آئندہ 3/نومبر سے کلکٹر آفس کے روبرو بھوک ہڑتال کی جائے گی۔ اس وفد میں سابق ڈپٹی میئر شمیم عبداللہ، عبدالغفار، سابقہ کارپوریٹر عبداللطیف، ایڈوکیٹ محمد ناصر، سید شیر علی، بابو بھائی کھوکے والے، رحیم احمد خان، عبدالعزیز قریشی، عبدالحبیب باغبان، سید فصیح الدین، شیخ جاوید چاؤش، سید شعیب حسین، ایڈوکیٹ شہباز، رمیش گوڑبولے، عبدالحبیب باوزیر، عبدالوہاب، عبدالمختار، عبدالرحیم، منتجب الدین و دیگر موجود تھے۔