سڑک کی مرمت کے لیے ناندیڑ کا بس اسٹینڈ 12 اپریل سے کوٹھا میدان منتقل کیا جائے گا

ناندیڑ:4؍اپریل ( نمائندہ اعتبار) ضلع کلکٹر راہول کرڈیلے نے ناندیڑ کے مرکزی بس اسٹینڈ کی سڑک سے متعلق مسئلے کو حل کر دیا ہے، اور اب اس سڑک کی تعمیر کے لیے بس اسٹینڈ کو عارضی طور پر کوٹھا میدان میں منتقل کیا جا رہا ہے۔ اس نئے فیصلے کے مطابق 12 اپریل سے پرانا بس اسٹینڈ سڑک کی تعمیر کے لیے بند کر دیا جائے گا۔ ضلع انتظامیہ نے عوام سے اپیل کی ہے کہ وہ اس فیصلے میں تعاون کریں اور متعلقہ محکمے طے شدہ وقت سے پہلے سڑک کا کام مکمل کریں۔ناندیڑ ریلوے اسٹیشن سے مرکزی بس اسٹینڈ تک کی سڑک انتہائی خستہ حال ہو چکی ہے۔ اس سلسلے میں ضلع کلکٹر کے دفتر میں منعقد کئی میٹنگوں میں مختلف سطحوں کے نمائندوں نے شکایتیں درج کرائی تھیں۔ یہ فیصلہ کافی وقت سے زیر التوا تھا۔ اس سے قبل کے کلکٹر نے بھی دو مرتبہ اس موضوع پر میٹنگز کی تھیں۔ 12 مارچ کو کلکٹر راہول کرڈیلے نے بذاتِ خود بس اسٹینڈ کا دورہ کر کے صورتِ حال کا جائزہ لیا، جس کے بعد فوری طور پر یہ فیصلہ لیا گیا۔اس فیصلے کے باعث مسافروں کو کسی حد تک پریشانی کا سامنا ہو سکتا ہے، تاہم کلکٹر نے سڑک کو فوری طور پر مرمت کرنے کے احکامات بھی جاری کیے ہیں۔ اس کام کو مقررہ مدت میں مکمل کرنے کے لیے مہاراشٹر اسٹیٹ ٹرانسپورٹ کارپوریشن کے سینئر آفیسرز کو بھی ہدایات دی گئی ہیں۔ مرمت کے دوران ڈرینج لائن، پائپ لائن، فائبر کیبل وغیرہ سے متعلق تمام رکاوٹوں کو بھی فوری دور کرنے کی ہدایت میٹنگ میں دی گئی ہے۔میونسپل کمشنر پر اس تبدیلی کے باعث متعدد ذمہ داریاں آئیں گی، جن کے لیے انہیں فوری طور پر عوام کو بس اسٹینڈ کی پرانی سہولیات مہیا کروانے پر خاص توجہ دینے کی تاکید کی گئی ہے۔ اس کے علاوہ عارضی بس اسٹینڈ کے قیام کے دوران مسافروں کی حفاظت، عارضی بیت الخلاء، صفائی گھروں اور دیگر سہولیات کی فراہمی نیز ٹریفک میں تبدیلی کے باعث نئے کلومیٹر فاصلے مقرر کرنے جیسے کام متعلقہ محکموں کو مقررہ وقت میں مکمل کرنے کی ہدایت دی گئی ہے۔ اس سلسلے میں ریسیڈنٹ ڈپٹی کلکٹر، ناندیڑ تحصیلدار، ڈپو مینیجر، پولیس ٹریفک برانچ، علاقائی ٹرانسپورٹ ڈپارٹمنٹ اور میونسپل کارپوریشن کے عملے کو وقتاً فوقتاً جائزہ لیتے ہوئے یہ سڑک ریکارڈ وقت میں مکمل کرنے کے احکامات ضلع کلکٹر نے دیے ہیں۔