سنبھل میں جامع مسجد کے سروے پر تشدد: تین لوگوں کی موت، 15 کو حراست میں لیا گیا

سنبھل: 24 نومبر:اتوار کی صبح اتر پردیش کے سنبھل میں عدالت کے حکم پر جامع مسجد کے سروے کے دوران مقامی لوگوں اور پولیس کے درمیان پرتشدد جھڑپیں ہوئیں، جس کے نتیجے میں تین افراد ہلاک ہو گئے۔ پتھر بازی میں تقریباً 20 پولیس اہلکار زخمی ہوئے ہیں، مراد آباد کے کمشنر انجنیا سنگھ نے میڈیا سے بات کرتے ہوئے کہا کہ عدالت کے حکم پر اتوار کی صبح 7 بجے سے 11 بجے تک جامع مسجد کا سروے کیا جانا تھا۔ عدالت کے حکم پر ایڈووکیٹ کمشنر کی قیادت میں سروے ٹیم یہاں پہنچی۔ مناسب سیکورٹی فورس بھی ٹیم کے ساتھ تھی۔ ڈی ایم اور پولیس سپرنٹنڈنٹ بھی موجود تھے۔ ٹیم سروے کرنے جامع مسجد پہنچی۔ شروع میں سب کچھ ٹھیک تھا۔ سروے میں تقریباً دو گھنٹے لگے۔ اسی وقت وہاں بھیڑ جمع ہو گئی۔ شروع شروع میں لوگ نعرے لگانے لگے۔ کچھ دیر بعد وہاں پتھراؤ شروع ہو گیا۔ تاہم بھیڑ مسجد کے احاطے تک نہیں پہنچ سکی۔ پولیس نے ہجوم کو منتشر کردیا۔ سروے کے بعد ٹیم 11 بجے کے بعد روانہ ہوئی تو لوگوں نے پتھراؤ شروع کر دیا۔ پولیس نے طاقت کا استعمال کرتے ہوئے ٹیم کو بحفاظت باہر نکالا۔ پولیس نے آنسو گیس کے گولے بھی چھوڑے۔ تقریباً 20 پولیس اہلکار زخمی ہوئے ہیں۔ ایک کانسٹیبل کے سر پر شدید چوٹیں آئی ہیں۔ اس فائرنگ میں تین افراد ہلاک ہوئے ہیں۔ جاں بحق ہونے والوں کی شناخت نعیم، بلال اور نعمان کے نام سے ہوئی ہے۔فی الحال صورتحال قابو میں ہے۔ اب تک 15 افراد کو حراست میں لیا گیا ہے۔ ان لوگوں سے پوچھ گچھ کی جا رہی ہے۔ سب کو راضی کرنے کی کوشش کی جا رہی ہے۔ عوامی نمائندوں سے بھی بات چیت ہو رہی ہے۔