زیتون: قرآن کی روشنی اور جدید سائنس

از قلم : عارف محمد خان جلگاؤں

قدرت نے انسان کو بے شمار نعمتوں سے نوازا ہے، لیکن کچھ نعمتیں ایسی ہیں جنہیں خصوصی اہمیت حاصل ہے۔ زیتون انہی میں سے ایک ہے، جسے نہ صرف قدیم تہذیبوں میں اہمیت دی گئی بلکہ نے بھی اسے ایک بابرکت درخت قرار دیا۔ آج جدید سائنس بھی زیتون اور اس کے تیل کے حیرت انگیز طبی فوائد کو تسلیم کرتی ہے۔
قرآن میں زیتون کا مقام:
قرآن مجید میں زیتون کا ذکر متعدد مقامات پر آیا ہے، جو اس کی عظمت اور افادیت کی واضح دلیل ہے۔ سورۃ التین میں اللہ تعالیٰ فرماتا ہے:
"وَالتِّينِ وَالزَّيْتُونِ”
(قسم ہے انجیر اور زیتون کی)
اسی طرح سورۃ النور میں زیتون کو "شجرۂ مبارکہ” یعنی بابرکت درخت کہا گیا ہے:
"يُوقَدُ مِن شَجَرَةٍ مُّبَارَكَةٍ زَيْتُونَةٍ”
یہ آیات اس بات کی طرف اشارہ کرتی ہیں کہ زیتون محض ایک پھل نہیں بلکہ ایک خاص روحانی اور جسمانی اہمیت کا حامل خزانہ ہے۔
حدیث نبوی ﷺ میں بھی زیتون کی افادیت کو بیان فرمایا: "زیتون کا تیل استعمال کرو اور اس سے مالش کرو، کیونکہ یہ بابرکت درخت سے حاصل ہوتا ہے۔”
یہ ارشاد اس بات کی تصدیق کرتا ہے کہ زیتون نہ صرف خوراک بلکہ علاج کا بھی ایک اہم ذریعہ ہے۔
جدید سائنس کی روشنی میں زیتون کے فوائد:
سائنسدانوں کے مطابق زیتون اور اس کا تیل صحت کے لیے بے حد مفید ہے۔ اس میں موجود قدرتی اجزاء انسانی جسم کو مختلف بیماریوں سے محفوظ رکھتے ہیں۔
دل کی بیماریوں سے تحفظ:
زیتون کا تیل دل کے لیے انتہائی مفید سمجھا جاتا ہے۔ یہ خراب کولیسٹرول (LDL) کو کم اور اچھے کولیسٹرول (HDL) کو بڑھاتا ہے، جس سے دل کی بیماریوں کا خطرہ کم ہو جاتا ہے۔
دماغی صحت میں بہتری:
تحقیقات کے مطابق زیتون کا استعمال دماغی کارکردگی کو بہتر بناتا ہے اور یادداشت کو مضبوط کرتا ہے۔ یہ جیسے مرض کے خطرے کو بھی کم کرتا ہے۔
قوتِ مدافعت میں اضافہ:
زیتون میں اینٹی آکسیڈنٹس کی بڑی مقدار موجود ہوتی ہے جو جسم کو مختلف انفیکشنز اور بیماریوں سے بچانے میں مدد دیتے ہیں۔
نظامِ ہضم کے لیے مفید:
زیتون کا تیل معدے کے لیے نہایت مفید ہے۔ یہ ہاضمہ بہتر بناتا ہے اور قبض و تیزابیت جیسے مسائل کو کم کرتا ہے۔
جلد اور بالوں کی خوبصورتی:
زیتون کا تیل جلد کو نرم، ملائم اور چمکدار بناتا ہے جبکہ بالوں کو مضبوط اور گھنا کرتا ہے۔ یہی وجہ ہے کہ اسے قدرتی حسن کا راز بھی کہا جاتا ہے۔
سائنسی تحقیق اور عالمی اہمیت:
دنیا بھر میں زیتون کے تیل کو "Liquid Gold” یعنی مائع سونا کہا جاتا ہے۔ خاص طور پر بحیرۂ روم کے ممالک میں زیتون کا استعمال روزمرہ زندگی کا حصہ ہے، جہاں دل کی بیماریوں کی شرح نسبتاً کم دیکھی گئی ہے۔