ریاست کا نام بدل کر ‘کیرالم’ کرنے کی تجویز کیرالہ اسمبلی میں ایک بار پھر پاس ہو گئی

ترواننت پورم: 24 جون:کیرالہ اسمبلی میں ریاست کا نام تبدیل کرنے سے متعلق قرارداد متفقہ طور پر منظور کر لی گئی۔ یہ تجویز پیر کو وزیر اعلیٰ پنارائی وجین نے پیش کی۔ تجویز کے مطابق کیرالہ کا نام بدل کر کیرلم کر دیا جائے گا۔ اب اس تجویز کو منظوری کے لیے مرکز کو بھیجا جائے گا۔ آپ کو بتاتے چلیں کہ گزشتہ سال 9 اگست کو بھی اسی طرح کی ایک قرارداد متفقہ طور پر منظور کرکے مرکز کو بھیجی گئی تھی، جس میں آئین کے آرٹیکل 3 کے تحت ریاستوں کے ناموں میں ترمیم کے لیے فوری اقدامات کرنے کا مطالبہ کیا گیا تھا۔ یہ ریاست کے آئین، اس کے علاقے کی حدود یا موجودہ ریاست کے نام میں تبدیلیوں سے متعلق ہے۔ وزیراعلیٰ نے کہا کہ آئین کے پہلے شیڈول میں ہی ایسی ترمیم کی گنجائش ہونی چاہیے، اس لیے نئی تجویز لائی جا رہی ہے۔ نام کو تبدیل کرنے کے بارے میں اپنی تجویز میں، سی ایم پنارائی وجین نے کہا کہ ملیالم میں ‘کیرلام’ نام کا استعمال عام ہے۔ لیکن سرکاری ریکارڈ میں ریاست کا نام صرف کیرالہ لکھا گیا ہے۔ انہوں نے کہا کہ ملیالم بولنے والی برادریوں کے لیے کیرالہ بنانے کی ضرورت قومی آزادی کی جدوجہد کے وقت سے ہی پیدا ہوئی تھی۔ گزشتہ سال اس تجویز کو پیش کرتے ہوئے وزیر اعلیٰ نے کہا تھا کہ "یہ ایکٹ 118 کے تحت ایوان کے سامنے رکھا جا رہا ہے۔” جس میں مرکزی حکومت سے درخواست کی گئی ہے کہ وہ آئین ہند کے آٹھویں شیڈول میں شامل تمام زبانوں میں ریاست کا سرکاری نام تبدیل کر کے ‘کیرالم’ کر دیں۔