راج ٹھاکرے امیت شاہ سے ملنے پہنچے، ایم این ایس کی این ڈی اے میں شمولیت کا فیصلہ

نئی دہلی: 20مارچ:مہاراشٹر میں، بی جے پی کو این ڈی اے اتحاد میں ایک اور سیاسی پارٹی کو شامل کرنے میں کامیابی ملنے جا رہی ہے۔ یہ تقریباً طے ہے کہ مہاراشٹر نونرمان سینا (ایم این ایس) این ڈی اے اتحاد کا حصہ بنے گی۔ایم این ایس کے سربراہ راج ٹھاکرے اتحاد کے فارمولے کو حتمی شکل دینے کے لیے مرکزی وزیر داخلہ امیت شاہ کی رہائش گاہ پہنچ گئے ہیں۔ امیت شاہ اور راج ٹھاکرے کی اس میٹنگ میں اتحاد اور سیٹوں کے حوالے سے فیصلے کیے جائیں گے۔ اس سے پہلے بی جے پی کے قومی جنرل سکریٹری ونود تاوڑے نے راج ٹھاکرے سے ملاقات کی اور اتحاد پر تبادلہ خیال کیا اور پھر دونوں رہنما امیت شاہ کی رہائش گاہ پہنچے۔ آپ کو بتادیں کہ ایم این ایس سربراہ پیر کی رات دیر گئے دہلی آئے تھے تاکہ بی جے پی کے اعلیٰ لیڈروں سے ملاقات کر سکیں۔ راج ٹھاکرے کے این ڈی اے اتحاد میں شامل ہونے سے بی جے پی کو مہاراشٹر میں کامیابی حاصل ہونے کی امید ہے۔ راج ٹھاکرے آنجہانی بالا صاحب ٹھاکرے کے بھتیجے ہیں اور اپنے انداز میں فائر برانڈ کی سیاست کرنے کے لیے جانے جاتے ہیں۔