حملہ ہوا تو آبنائے ہرمز میں بارودی سرنگیں بچھا دیں گے:ایران کی وارننگ

تہران:23؍مارچ: امریکی صدر ڈونلڈ ٹرمپ کی جانب سے آبنائے ہرمز کھولنے کے لیے دی گئی مہلت کے ردعمل میں ایران کی دھمکیاں مسلسل جاری ہیں۔ یہ مہلت ہفتے کی شام دی گئی تھی جو آج پیر کی شام ختم ہو رہی ہے۔ایرانی کونسلِ دفاع نے آج ایک بیان میں کہا کہ جنگ میں شامل نہ ہونے والے ممالک کے لیے آبنائے ہرمز سے گزرنے کا واحد راستہ تہران کے ساتھ رابطہ اور ہم آہنگی ہے۔مزید برآں ایران نے عندیہ دیا کہ اگر اس کے ساحلوں یا جنوبی جزیروں پر حملہ کیا گیا تو ایرانی افواج مواصلاتی رابطے منقطع کر دیں گی اور سمندر میں بارودی سرنگیں بچھا دیں گی۔یہ اشارہ بالواسطہ طور پر ان خبروں کی جانب ہے ،جن میں کہا گیا ہے کہ امریکا ایران پر دبا ڈالنے کے لیے جزیرہ خارک جو ملک کی تیل برآمدات کا مرکزی مرکز ہے،پر قبضہ یا محاصرہ کرنے کا منصوبہ بنا رہا ہے، تاکہ تہران کو تمام جہازوں کے لیے آبنائے ہرمز کھولنے پر مجبور کیا جا سکے۔