حمد باری تعالیٰ

اتنی سی ہے میرے دل کی آرزو
ہو لگن تیری ہو تیری جستجو

حکم سے تیرے چلے بادِ صبا
چل رہا ہے زندگی کا سلسلہ
تو بدل دے رات دن آب وہوا
لفظ کن سےتونے کی روشن فضا

دوڑتا ہے جسم میں جب تک لہو
ہو فقط میری نظر میں تو ہی تو

ضبط سےتونے کھلائے گلستاں
دلکشی سے پر زمین و آسماں
جگمگاتی روشنی کی کہکشاں
کیسی حکمت سے بنائے دو جہاں

ہو وظیفہ میرا تیری گفتگو
اے خدا دیکھوں تجھےہی چار سو

تو ہی برسائے زمیں پر بارشیں
تیرے قبضے میں ہیں ساری برکتیں
جانتا ہے تو دلوں کی چاہتیں
تونے بخشی ہے جہاں کو وسعتیں

بندہ پرور بندگی ہو باوضو
روز آخر رکھنا میری آبرو

نور تیرا ہے فقط نور مبیں
چاند سورج تیرے ہیں تیری زمیں
سارا عالم ہے ترے زیر نگیں
خالقِ کل ہے تو ہی کرسی نشیں

تیری قدرت کے ہیں مظہر کو بہ کو
کیا سمندر جھیل صحرا آب جو

چلتے ہیں تیری طرف سب قافلے
تو دکھائے منزلوں کے راستے
تیرے اندازے ترے ہیں ضابطے
خوبصورت سب نظارے ہیں ترے

تیرے رستے چلتے ہیں سب راہ رو
تیرے دم سے ہے چمن کی رنگ بو

علیم اسرار